‘ജനങ്ങള്‍ക്കൊപ്പം ഞാനും ആരോഗ്യവും സന്തോഷവും നേരുന്നു’; വി എസിന് ജന്മദിനാശംസയുമായി ഗവര്‍ണര്‍; ട്വീറ്റ്

തിരുവനന്തപുരം: നൂറാം വയസ്സിലേക്ക് കടക്കുന്ന മുന്‍ മുഖ്യമന്ത്രി വി എസ് അച്യുതാനന്ദന് പിറന്നാള്‍ ആശംസകള്‍ നേര്‍ന്ന് ഗവര്‍ണര്‍ ആരിഫ് മുഹമ്മദ് ഖാന്‍. വി എസ്സിന്റെ മകന്‍ അരുണ്‍ കുമാറിനെ ഫോണില്‍ വിളിച്ച് ആശംസ അറിയിക്കുകയായിരുന്നു. ‘നൂറാം വയസ്സിലേക്ക് കടക്കുന്ന വി എസ്സിന് കേരളത്തിലെ ജനങ്ങള്‍ക്കൊപ്പം ഞാനും ആരോഗ്യവും സന്തോഷവും നേരുന്നു’: ഗവര്‍ണര്‍ ആശംസ ട്വീറ്റില്‍ പറഞ്ഞു.

തൊണ്ണൂറ്റിയൊന്‍പതാം ജന്മദിനം ആഘോഷിക്കുന്ന പ്രിയസഖാവ് വി.എസ്സിന് ഹൃദയം നിറഞ്ഞ ആശംസകള്‍ നേരുന്നുവെന്ന് മുഖ്യമന്ത്രി പിണറായി വിജയന്‍ ഫേസ്ബുക്കില്‍ കുറിച്ചു. ഇത്തവണ ആഘോഷങ്ങളൊന്നുമില്ലാത്ത പിറന്നാളാണ് വിഎസിന്. നേരിയ പക്ഷാഘാതത്തിന്റെ പടിയിലകപ്പെട്ടതിനാല്‍ സന്ദര്‍ശകര്‍ക്ക് കര്‍ശന നിയന്ത്രണമാണുള്ളത്. അതിനാല്‍ കാര്യമായ പിറന്നാള്‍ ആഘോഷവുമില്ല. ആരോഗ്യ പ്രശ്!നങ്ങള്‍ മൂലം വിഎസ് പൊതുജീവിതത്തില്‍ നിന്നും രാഷ്ട്രീയ പ്രവര്‍ത്തനങ്ങളില്‍ നിന്നും പൂര്‍ണമായും ഒഴിഞ്ഞിട്ട് 3 വര്‍ഷങ്ങളായി. നിലവില്‍ തിരുവനന്തപുരത്ത് മകന്‍ വിഎ അരുണ്‍ കുമാറിന്റെ ബാര്‍ട്ടണ്‍ഹിലിലെ വസതിയില്‍ വിശ്രമ ജീവിതം നയിക്കുകയാണ് വിഎസ്.

2019 ലാണ് വിഎസ് അവസാനമായി ഒരു പൊതു പരിപാടിയില്‍ പങ്കെടുത്തത്. അന്ന് പുന്നപ്ര വയലാര്‍ രക്തസാക്ഷിത്വ ദിനാചരണത്തില്‍ വിഎസ് പങ്കെടുത്തിരുന്നു, എന്നാല്‍ അതിന് ശേഷം തിരുവനന്തപുരത്ത് മടങ്ങിയെത്തിയ അദ്ദേഹത്തിന്റെ ആരോഗ്യ നില കൂടുതല്‍ വഷളായിരുന്നു. തുടര്‍ന്ന് ആശുപത്രിയില്‍ പ്രവേശിപ്പിക്കുകയും ചെയ്തു. അതിന് ശേഷം പൂര്‍ണവിശ്രമത്തിലാണ് അദ്ദേഹം