ഒന്നരമാസം മുമ്പ് അമ്പലമുക്കിലെ വീട്ടില്‍ കയറി അജ്ഞാതന്‍, സിസിടിവി ദൃശ്യങ്ങള്‍ പുറത്ത്

തിരുവനന്തപുരം : കുറവന്‍കോണത്ത് വീടിനകത്ത് കടക്കാന്‍ ശ്രമിച്ച അജ്ഞാതനോട് സാമ്യമുള്ളയാള്‍ അമ്പമുക്കിലെ വീട്ടില്‍ കയറാന്‍ ശ്രമിച്ചതിന്റെ ദൃശ്യങ്ങള്‍ പുറത്ത്. തിരുവോണ ദിവസം രാത്രി വൈകി ഒരാള്‍ അമ്പലമുക്കിലെ വീട്ടില്‍ കയറാന്‍ ശ്രമിക്കുന്നതിന്റെ സിസിടിവി ദൃശ്യങ്ങള്‍ ലഭിച്ചു. പ്രതിയടക്കമുള്ള ദൃശ്യം സഹിതം പേരൂര്‍ക്കട പൊലീസിന് പരാതി നല്‍കിയിട്ടും പ്രതിയെ പിടികൂടാനായില്ല.

തിരുവോണ ദിവസം രാത്രി രണ്ട് മണിയോടെയാണ് അജ്ഞാതന്‍ വീട്ടിലെത്തിയത്. കുറവന്‍ കോണത്തിന് സമാനമായ രീതിയില്‍ ടെറസ് ഭാഗത്ത് കൂടിയാണ് ഇയാള്‍ വീട്ടിലേക്ക് കടന്നത്. അതിന് ശേഷം സിസിടിവി ശ്രദ്ധയില്‍പ്പെട്ടതോടെ ഇലക്ട്രിക് ഫ്യൂസ് ഊരി. ഇതോടെ സിസിടിവി ഓഫായി. പിറ്റേ ദിവസമാണ് വീട്ടുടമസ്ഥരുടെ ശ്രദ്ധയിലിത് പതിഞ്ഞത്. മോഷണം നടന്നില്ല. ദൃശ്യങ്ങളടക്കം കൃത്യമായി പരാതി നല്‍കിയിട്ടും പ്രതിയെ പിടിക്കാന്‍ ഇതുവരെയും പൊലീസിന് കഴിഞ്ഞിട്ടില്ല.

അതിനിടെ മ്യൂസിയത്തില്‍ സ്ത്രീയെ ആക്രമിച്ച പ്രതിയെ കുറിച്ച് നിര്‍ണായക സൂചന കിട്ടിയെന്നാണ് പൊലീസ് അറിയിക്കുന്നത്. അക്രമിയെത്തിയ വാഹനം കേന്ദ്രീകരിച്ചാണ് നിലവില്‍ അന്വേഷണം പുരോഗമിക്കുന്നത്.