തൃശ്ശൂര്‍ മതിലകത്ത് തെരുവുനായ ആക്രമണം, 6 ആടുകളെ കൊന്നു

തൃശ്ശൂര്‍: തൃശ്ശൂര്‍ മതിലകത്ത് ആടുകള്‍ക്ക് നേരെ തെരുവുനായ്ക്കളുടെ ആക്രമണം. 6 ആടുകള്‍ ചത്തു. അഞ്ച് ആടുകള്‍ക്ക് പരിക്കേറ്റു. കല്ലൂപ്പറമ്പില്‍ നസീബിന്റെ ആടുകളെയാണ് തെരുവ് നായ്ക്കൂട്ടം ആക്രമിച്ചത്. നസീബിന്റെ വീടുപണി നടക്കുന്നതിനാല്‍ തൊട്ടടുത്ത പറമ്പിലാണ് ആടുകളെ കെട്ടിയിരുന്നത്. ഇന്നലെ രാത്രി ആടുകളെ കെട്ടിയിട്ട സ്ഥലത്ത് നിന്ന് ബഹളം കേട്ടതിനെ തുട!ര്‍ന്ന് നസീബ് എത്തിയപ്പോഴാണ് ആടുകളെ നായ്ക്കള്‍ കടിച്ചു കീറിയതായി കണ്ടെത്തിയത്. നസീബും സംഘവും സ്ഥലത്തെത്തിയപ്പോള്‍ നായ്ക്കള്‍ തൊട്ടടുത്ത മതില്‍ ചാടി രക്ഷപ്പെട്ടു. ഒന്നര ലക്ഷത്തോളം രൂപയുടെ നഷ്ടമുണ്ടായതായി നസീബ് പറഞ്ഞു. പഞ്ചായത്തില്‍ നിന്ന് വെറ്റിനറി ഡോക്ടര്‍ എത്തി ആടുകളെ പരിശോധിച്ചു.