യുവതി തീരുമാനം മാറ്റി; വനിതാ പൊലീസ് സ്റ്റേഷനിലെത്തിയ യുവാവ് കൈഞരമ്പ് മുറിച്ച് ആത്മഹത്യയ്ക്ക് ശ്രമിച്ചു

കോഴിക്കോട് : കാണാതായ യുവതിക്കൊപ്പം കോഴിക്കോട് വനിതാ പൊലീസ് സ്റ്റേഷനില്‍ എത്തിയ യുവാവ് കൈഞരമ്പ് മുറിച്ച് ആത്മഹത്യയ്ക്ക് ശ്രമിച്ചു. തിരുവനന്തപുരത്ത് നിന്ന് കാണാതായ ഇരുപത്തിയാറുകാരിയുമായ വിവാഹിതയ്‌ക്കൊപ്പം ഹാജരായ മലപ്പുറം നിലമ്പൂര്‍ കരുളായി സ്വദേശി അക്ബറലിയാണ് (24) പൊലീസ് സ്റ്റേഷന് പുറത്ത് വച്ച് ബ്ലേഡ് കൊണ്ട് കൈയിന്റെ ഞരമ്പ് മുറിച്ച് ആത്മഹത്യാ ശ്രമം നടത്തിയത്. ഇന്നലെ രാത്രിയായിരുന്നു സംഭവം. കഴിഞ്ഞ വ്യാഴാഴ്ച മുതല്‍ യുവതിയെ കാണാതായെന്ന് കാണിച്ച് തിരുവനന്തപുരം പൊലീസ് സ്റ്റേഷനില്‍ കേസ് രജിസ്റ്റര്‍ ചെയ്തിരുന്നു.

പൊലീസ് തിരച്ചില്‍ നടത്തുന്നതിനിടയിലാണ് ഇവര്‍ കോഴിക്കോട് വനിതാ സ്റ്റേഷനില്‍ എത്തുന്നതും തങ്ങള്‍ രണ്ടുപേരും ഒന്നിച്ചുജീവിക്കാന്‍ തീരുമാനിച്ചെന്ന് അറിയിക്കുന്നതും. യുവതിക്കെതിരെ തിരുവനന്തപുരത്ത് കേസുള്ളതിനാല്‍ യുവതിയെ കസ്റ്റഡിയില്‍വെക്കാന്‍ പൊലീസ് തീരുമാനിച്ചു. ഇതിനിടയിലാണ് സ്റ്റേഷനില്‍ യുവാവും യുവതിയും തമ്മില്‍ മലപ്പുറത്തെ വീട്ടിലേക്ക് പോകുന്നതുമായി ബന്ധപ്പെട്ട് വാക്കേറ്റമുണ്ടായി.

താന്‍ യുവാവിനൊപ്പം പോകുന്നില്ലെന്ന് അഞ്ചുവയസ്സുള്ള കുട്ടിയുടെ അമ്മയായ യുവതി പൊലീസിനെ അറിയിച്ചു. തുടര്‍ന്ന് യുവാവ് സമീപത്തെ കടയില്‍പ്പോയി ബ്ലേഡ് വാങ്ങി കൈമുറിച്ച് പൊലീസ് സ്റ്റേഷനില്‍ തിരിച്ചെത്തുകയായിരുന്നു. വനിതാ പൊലീസ് വിവരം സിറ്റി കണ്‍ട്രോള്‍ റൂമില്‍ അറിയിച്ചതിനെ തുടര്‍ന്ന് പൊലീസെത്തി യുവാവിനെ കോഴിക്കോട് ബീച്ച് ഗവ. ആശുപത്രിയിലെത്തിച്ചു. യുവാവിന്റെ പരിക്ക് ഗുരുതരമല്ലെന്ന് അധികൃതര്‍ അറിയിച്ചു. യുവതിയെ തിരുവനന്തപുരം പൊലീസിനൊപ്പം വിടുമെന്ന് കോഴിക്കോട് പൊലീസ്.