രാഹുലിനെ കെട്ടിപ്പിടിച്ചും അനുഗ്രഹിച്ചും വൃദ്ധ, ഭാരത് ജോഡോ യാത്രയിലെ മറ്റൊരു വൈറല്‍ ദൃശ്യം

ഭാരത് ജോഡോ യാത്രയ്ക്കിടെ കോണ്‍ഗ്രസ് നേതാവ് രാഹുല്‍ ഗാന്ധിയെ കെട്ടിപ്പിടിക്കുകയും അനുഗ്രഹിക്കുകയും ചെയ്യുന്ന വൃദ്ധയുടെ വീഡിയോ സോഷ്യല്‍ മീഡിയയില്‍ വൈറലായിരിക്കുകയാണ്. കന്യാകുമാരിയില്‍ നിന്ന് 12 സംസ്ഥാനങ്ങളും 2 കേന്ദ്രഭരണ പ്രദേശങ്ങളും ചുറ്റി കശ്മീരിലെത്തുക എന്ന ലക്ഷ്യത്തോടെയാണ് രാഹുല്‍ ഗാന്ധി പാര്‍ട്ടി പ്രവര്‍ത്തകര്‍ക്കൊപ്പം ഭാരത് ജോഡോ യാത്ര തുടരുന്നത്. കോണ്‍ഗ്രസ് ട്വിറ്ററില്‍ അപ്‌ലോഡ് ചെയ്ത വീഡിയോയില്‍ വൃദ്ധയെ ചേര്‍ത്ത് പിടിച്ച രാഹുലിനെ കാണാം. രാഹുലിന്റെ തോളില്‍ തട്ടി സ്ത്രീ അനുഗ്രഹിക്കുന്നതും വീഡിയോയില്‍ കാണാം. അവസാനം, ഗാന്ധി വീണ്ടും തന്റെ അനുയായികള്‍ക്ക് നേരെ കൈ വീശി മാര്‍ച്ച് തുടരുന്നു.

സെപ്റ്റംബര്‍ ഏഴിന് ആരംഭിച്ച കോണ്‍ഗ്രസിന്റെ ഭാരത് ജോഡോ യാത്ര അടുത്തിടെ 1000 കിലോമീറ്റര്‍ പിന്നിട്ടിരുന്നു. യാത്രയിലുടനീളം, രാഹുല്‍ ഗാന്ധിയും അദ്ദേഹത്തിന്റെ സഹയാത്രികരും ആളുകളുമായി സംവദിക്കുന്നതിന്റെ ദൃശ്യങ്ങള്‍ സോഷ്യല്‍ മീഡിയ വഴി പങ്കുവയ്ക്കുന്നുണ്ട്. കര്‍ണാടകയിലെ മാണ്ഡ്യയില്‍ വച്ച് കോണ്‍ഗ്രസ് പാര്‍ട്ടിയുടെ മുന്‍ അധ്യക്ഷ സോണിയ ഗാന്ധിയും രാഹുല്‍ ഗാന്ധിക്കൊപ്പം ചേര്‍ന്നിരുന്നു. കൊവിഡ് ബാധിച്ചതിന് ശേഷം സോണിയാ ഗാന്ധി നടത്തുന്ന ആദ്യ പൊതു യാത്രയായിരുന്നു ഇത്. നടക്കുന്നതിനിടയില്‍ രാഹുല്‍ ഗാന്ധി അമ്മയുടെ ഷൂലേസ് കെട്ടുന്ന ഫോട്ടോയും കോണ്‍ഗ്രസ് ട്വിറ്ററില്‍ പങ്കുവെച്ചിരുന്നു.

രാഹുല്‍ ഗാന്ധിയെ കണ്ടതിന് ശേഷം കണ്ണുനീര്‍ നിയന്ത്രിക്കാന്‍ കഴിയാതെ ഒരു പെണ്‍കുട്ടിക്ക് കരയുന്ന വീഡിയോ നേരത്തെ പ്രചരിച്ചിരുന്നു. രാഹുലിനെ കാണാന്‍ അനുവദിച്ചപ്പോള്‍ പെണ്‍കുട്ടി സന്തോഷത്തോടെ ചാടുന്നതും ചിരിക്കുന്നതും ഒരേ സമയം കരയുന്നതും ഇതില്‍ കാണാം. ഭാരത് ജോഡോ യാത്രയുടെ ഭാഗമായി രാഹുല്‍ ഗാന്ധി ഏകദേശം അഞ്ച് മാസത്തിനുള്ളില്‍ 12 സംസ്ഥാനങ്ങളിലൂടെയും രണ്ട് കേന്ദ്രഭരണ പ്രദേശങ്ങളിലൂടെയും സഞ്ചരിക്കും.