ഞാന്‍ പറയാത്ത കാര്യങ്ങള്‍ എന്റെ പേരില്‍ പ്രചരിപ്പിക്കരുത്: ഷാജി കൈലാസ്

എറണാകുളം: സുരേഷ് ഗോപിയുമായി ബന്ധപ്പെട്ട് തന്റെ പേരില്‍ സമൂഹമാദ്ധ്യമങ്ങളില്‍ പ്രചരിക്കുന്ന വ്യാജ വാര്‍ത്തയ്‌ക്കെതിരെ സംവിധായകന്‍ ഷാജി കൈലാസ്.

താനും സുരേഷ് ഗോപിയുമായുള്ളത് വര്‍ഷങ്ങളായി തുടരുന്ന ആത്മബന്ധം ആണെന്നും, അദ്ദേഹത്തെ നന്നായി അറിയാമെന്നും സംവിധായകന്‍ ഷാജി കൈലാസ് പറഞ്ഞു. എത്രയൊക്കെ പണിപ്പെട്ടാലും ഈ ആത്മബന്ധം നശിപ്പിക്കാന്‍ സാധിക്കില്ലെന്നും അദ്ദേഹം കൂട്ടിച്ചേര്‍ത്തു.

ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.

കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയയില്‍ ഞാന്‍ പറഞ്ഞിട്ടില്ലാത്ത ഒരു കാര്യം പലരും ഷെയര്‍ ചെയ്യുന്നത് കാണുവാന്‍ ഇടയായെന്ന് അദ്ദേഹം പറഞ്ഞു. ഒന്നോര്‍ക്കുക.. കമ്മീഷണറില്‍ തുടങ്ങിയതല്ല ഞാനും സുരേഷും തമ്മിലുളള ആത്മബന്ധം. സിനിമയിലേക്ക് വന്ന അന്ന് മുതല്‍ ഞങ്ങള്‍ സുഹൃത്തുക്കളാണ്. എന്റെ ആദ്യ ചിത്രത്തില്‍ നായകന്‍ സുരേഷായിരുന്നു. ഇനി എന്റെ അടുത്ത ചിത്രത്തിലും സുരേഷ് തന്നെയാണ് നായകന്‍. ഞങ്ങള്‍ക്കിടയില്‍ ഇണക്കങ്ങളും പിണക്കങ്ങളും ഉണ്ടാകാറുണ്ട്. അതിന്റെ ആഴവും വ്യാപ്തിയും എന്താണെന്ന് ഞങ്ങള്‍ രണ്ടുപേര്‍ക്കും അറിയാം. അന്നും ഇന്നും സഹജീവി സ്‌നേഹമുള്ള നല്ലൊരു വ്യക്തിത്വത്തിന് ഉടമയാണ് അവനെന്ന് എനിക്കറിയാമെന്നും ഷാജി കൈലാസ് വ്യക്തമാക്കി.

അവന്റെ രാഷ്ട്രീയവും എന്റെ രാഷ്ട്രീയവും വ്യത്യസ്തമാണ്. പക്ഷേ ഞങ്ങളുടെ സഹോദരതുല്യമായ സുഹൃത്ബന്ധം രാഷ്ട്രീയത്തിന് അതീതമാണ്. അതിന് നശിപ്പിക്കുവാന്‍ സാധിക്കുകയില്ല. ഇത്തരത്തില്‍ വ്യാജമായ വാര്‍ത്തകള്‍ നിര്‍മ്മിക്കുന്നതിലൂടെ ആനന്ദം കൊള്ളുന്നവര്‍ ദയവായി ഇത്തരം പ്രവര്‍ത്തികള്‍ നിര്‍ത്തുക. മാനസികമായി ഏറെ വേദന ഉളവാക്കുന്ന ഒന്നാണിതെന്നും അദ്ദേഹം കൂട്ടിച്ചേര്‍ത്തു.

കമ്മീഷണര്‍ എന്ന സിനിമയ്ക്ക് ശേഷം സുരേഷ് ഗോപി സിനിമയും യാഥാര്‍ത്ഥ്യവും തിരിച്ചറിയാന്‍ കഴിയാത്ത അവസ്ഥയിലേക്ക് എത്തിയിരുന്നുവെന്ന് ഷാജി കൈലാസ് പറഞ്ഞു എന്ന തരത്തിലായിരുന്നു വ്യാജ വാര്‍ത്ത. താന്‍ ഇക്കാര്യം പല തവണ സുരേഷ് ഗോപിയോട് സൂചിപ്പിച്ചു എന്നും, അപ്പോള്‍ ഭരത് ചന്ദ്രന്‍ സ്‌റ്റൈലില്‍ തന്നോട്ട് തട്ടിക്കയറി എന്നും ഷാജി കൈലാസ് പറഞ്ഞതായുമാണ് വാര്‍ത്തകള്‍ പ്രചരിച്ചിരുന്നത്.