അനിഷ്ടം പ്രകടമാക്കി ഗവര്‍ണര്‍

മുഖ്യമന്ത്രിയോടും പിണറായി സര്‍ക്കാരിനോടുമുള്ള വിട്ടുവീഴ്ചയ്ക്ക് തയ്യാറല്ലെന്ന ഭാവത്തോടെതന്നെ ഗവര്‍ണര്‍ ആരിഫ് മുഹമ്മദ് ഖാന്‍ ഇന്ന് നിയമസഭയിലെത്തുകയും മടങ്ങുകയും ചെയ്തു. ശരീരഭാഷയിലും ചലനത്തിലും ഗവര്‍ണര്‍ തന്റെ അനിഷ്ടം അദ്ദേഹം പ്രകടമാക്കി. നിയമസഭാ ബജറ്റ് സമ്മേളനത്തിന് തുടക്കംകുറിച്ചുകൊണ്ടുള്ള നയപ്രഖ്യാപന പ്രസംഗത്തിനായി ഗവര്‍ണര്‍ വന്നതും പോയതും, എല്ലാം നാടകീയം. നിയമസഭാ കവാടവത്തില്‍ ബൊക്കെയുമായാണ് മുഖ്യമന്ത്രിയും സ്പീക്കറും ഗവര്‍ണറെ കാത്തിരുന്നത്. കൃത്യസമയത്തുതന്നെ എത്തിയ ഗവര്‍ണര്‍ മുഖ്യമന്ത്രിയില്‍ നിന്നും സ്പീക്കറില്‍ നിന്നും ബൊക്കെ സ്വീകരിച്ചു. എന്നാല്‍, മുഖ്യമന്ത്രിയുടെ മുഖത്ത് നോക്കാനോ ഒരു പുഞ്ചിരി കൈമാറാനോ ഗവര്‍ണര്‍ തയ്യാറായില്ല. ഗൗരവഭാവത്തില്‍ ഒരു കൈക്കൂപ്പല്‍ നടത്തി മുന്നോട്ടുനടന്നു. തുടര്‍ന്ന് നിയമസഭയ്ക്കുള്ളിലേക്ക് കയറിയ ഗവര്‍ണര്‍ മുഖ്യമന്ത്രിയെ കാത്തുനില്‍ക്കാതെതന്നെ സ്പീക്കറുടെ ഡയസിലേക്ക് പോയി. പോകുന്നതിനിടെ ഭരണപക്ഷ നിരയിലെ മന്ത്രിമാരടക്കമുള്ളവര്‍ എഴുന്നേറ്റുനിന്ന് കൈക്കൂപ്പിയെങ്കിലും അവരുടെ മുഖത്ത് നോക്കാതെയും പുഞ്ചിരിക്കാതെയും ഗവര്‍ണര്‍ തിരിച്ച് കൈക്കൂപ്പി. ദേശീയ ഗാനത്തിന് ശേഷം ഗവര്‍ണര്‍ പ്രസംഗിക്കാനായി എഴുന്നേറ്റപ്പോള്‍ എല്ലാം ഒത്തുത്തീര്‍പ്പായോ എന്ന് പ്രതിപക്ഷ നിരയില്‍ നിന്ന് ചോദ്യങ്ങളുയര്‍ന്നു. അവ ഗൗനിക്കാതെ ആരിഫ് ഖാന്‍ പ്രസംഗം ആരംഭിച്ചു. തുടര്‍ന്ന് അവസാന ഖണ്ഡിക വായിക്കുകയും ദേശീയ ഗാനത്തിന് ശേഷം ഉടന്‍ സഭ വിടുകയുമായിരുന്നു. പോകുന്ന ഘട്ടത്തിലും മുഖ്യമന്ത്രി കൂടെ ചെന്നെങ്കിലും അദ്ദേഹത്തെ തിരിഞ്ഞ് നോക്കാന്‍പോലും ഗവര്‍ണര്‍ തയ്യാറായില്ല.