മമ്മൂട്ടിക്കൊപ്പം ശ്രദ്ധ നേടി തങ്കന്‍

മമ്മൂട്ടിയുടെ കാതലിനൊപ്പം ചര്‍ച്ചകളില്‍ നിറയുകയാണ് തങ്കനും, തങ്കനെ അവതരിപ്പിച്ച സുധി കോഴിക്കോടും… 15 വര്‍ഷമായി സിനിമയിലുണ്ട് സുധി. എന്നാല്‍ ആദ്യമായാണ് ശ്രദ്ധിക്കപ്പെടുന്നൊരു വേഷം ലഭിക്കുന്നത്. കാതലിന്റെ വിജയത്തോടെ സുധിയുടെ പഴയ സിനിമകളും പരതുകയാണ് സിനിമാ പ്രേമികള്‍. വിനു മോഹന്‍ നായകനായ സുല്‍ത്താന്‍ എന്ന സിനിമയിലാണ് സുധി കോഴിക്കോട് ആദ്യമായി അഭിനയിക്കുന്നത്. പിന്നീട് പാലേരി മാണിക്യം, ബാവൂട്ടിയുടെ നാമത്തില്‍, അങ്കിള്‍, ഗ്രേറ്റ് ഇന്ത്യന്‍ കിച്ചണ്‍ തുടങ്ങി 42 ചിത്രങ്ങള്‍. പാലേരി മാണിക്യത്തില്‍ മമ്മൂട്ടിക്കൊപ്പമുള്ള വേഷം ആത്മവിശ്വാസം നല്‍കുന്നതായിരുന്നു എന്നാണ് സുധി പറയുന്നത്. നടനെന്ന നിലയില്‍ ആളുകള്‍ തന്നെ തിരിച്ചറിഞ്ഞു തുടങ്ങിയതിന്റെ സന്തോഷവും ചെറുതല്ല സുധിക്ക്. കാതലില്‍ ജിയോ ബേബി കാത്തുവെച്ചിരുന്നത് ഇത്രയും വലിയൊരു ബോംബാണ് എന്ന് തനിക്ക് അറിയില്ലായിരുന്നു എന്നാണ് സുധി പറയുന്നത്. പ്രേക്ഷകര്‍ക്ക് ഇദ്ദേഹം സുധിയല്ല, തങ്കനാണ്.