അവിശ്വസനീയമായ പ്രഭാവലയം, നരേന്ദ്ര മോദിയെക്കുറിച്ച് മാധവ് സുരേഷ്

പ്രധാനമന്ത്രി നരേന്ദ്ര മോദിയുടെ അവിശ്വസനീയമായ പ്രഭാവലയത്തിനു മുന്നില്‍ നില്‍ക്കാന്‍ കഴിഞ്ഞത് ആവേശകരമായ അനുഭവമായിരുന്നുവെന്ന് സുരേഷ് ഗോപിയുടെ മകന്‍ മാധവ്. മോദിയോടൊപ്പമുള്ള ചിത്രം പങ്കുവച്ചുകൊണ്ടാണ് മാധവ് ഇങ്ങനെ കുറിച്ചത്. കഴിഞ്ഞ ദിവസം സുരേഷ് ഗോപിയോടും സഹോദരി ഭാവ്‌നിയോടുമൊപ്പം മാധവ് മോദിയെ സന്ദര്‍ശിച്ചിരുന്നു. മോദിയുടെ കൂടെ അപ്പോഴെടുത്ത ചിത്രങ്ങള്‍ക്കൊപ്പമാണ് മാധവ് തന്റെ സന്തോഷം പങ്കുവച്ചത്. ”ഇത്തരമൊരു അവിശ്വസനീയമായ പ്രഭാവലയത്തിന്റെ സാന്നിധ്യത്തില്‍ നില്‍ക്കാന്‍ കഴിഞ്ഞത് തന്നെ ആവേശകരമാണ്.”മാധവ് സുരേഷ് കുറിച്ചു. മക്കളോടൊപ്പം മോദിയെ സന്ദര്‍ശിച്ച ചിത്രങ്ങള്‍ സുരേഷ് ഗോപിയും സമൂഹമാധ്യമങ്ങളില്‍ പങ്കുവച്ചിരുന്നു. അടിക്കുറിപ്പുകളൊന്നുമില്ലാതെയാണ് താരം ചിത്രങ്ങള്‍ പങ്കുവച്ചത്. തൃശൂരില്‍ മഹിളാമോര്‍ച്ച സംഘടിപ്പിച്ച സ്ത്രീസംഗമത്തില്‍ പങ്കെടുക്കാനായിരുന്നു പ്രധാനമന്ത്രി കേരളത്തില്‍ എത്തിയത്. സുരേഷ് ഗോപിയുടെ നാല് മക്കളില്‍ ഇളയ ആളാണ് മാധവ്. ‘വരനെ ആവശ്യമുണ്ട്’ എന്ന സിനിമയില്‍ അതിഥി വേഷത്തിലാണ് മാധവ് അഭിനയത്തില്‍ അരങ്ങേറിയത്. വിന്‍സന്റ് സെല്‍വ സംവിധാനം ചെയ്യുന്ന ‘കുമ്മാട്ടിക്കളി’ എന്ന ചിത്രത്തിലൂടെ നായകനാകുന്നു. സിനിമ അടുത്ത വര്‍ഷം തിയറ്ററുകളിലെത്തും. കൂടാതെ അച്ഛന്‍ സുരേഷ് ഗോപിക്കൊപ്പം ‘ജെഎസ്‌കെ’ എന്ന ചിത്രത്തിലും മാധവ് പ്രധാന വേഷത്തിലെത്തുന്നുണ്ട്.