തിരുവല്ലയില്‍ ടോറസിലിടിച്ച് കാര്‍ തലകീഴായി മറിഞ്ഞു; രണ്ടുവയസുകാരന് ദാരുണാന്ത്യം

തിരുവല്ല: കാര്‍ ടോറസ് ലോറിയിലിടിച്ച് ഉണ്ടായ അപകടത്തില്‍ രണ്ടുവയസുകാരന് ദാരുണാന്ത്യം. ടോറസിലിടിച്ച് തലകീഴായി മറിഞ്ഞ കാറിന്റെ ഡോര്‍ തുറന്ന് കുഞ്ഞ് പുറത്തേയ്ക്ക് തെറിച്ചുവീഴുകയായിരുന്നു. കുട്ടിയെ ഉടന്‍ തന്നെ ആശുപത്രിയില്‍ പ്രവേശിപ്പിച്ചുവെങ്കിലും ഇന്ന് പുലര്‍ച്ചെ മരണം സംഭവിച്ചു.

ഇന്നലെ രാത്രി ഒന്‍പത് മണിയോടെയാണ് അപകടം നടന്നത്. കാര്‍ മറ്റൊരു വാഹനത്തെ മറികടക്കുന്നതിനിടെ ടോറസില്‍ ഇടിക്കുകയായിരുന്നു.

കാറില്‍ ഉണ്ടായിരുന്ന കുട്ടിയുടെ അമ്മയും അമ്മൂമ്മയും രക്ഷപ്പെട്ടു. പ്രാഥമിക ചികിത്സയ്ക്ക് ശേഷം അമ്മ കവിത ആശുപത്രി വിട്ടു. പരിക്കേറ്റ അമ്മൂമ്മ ജെസി ആശുപത്രിയില്‍ ചികിത്സയിലാണ്.