നാലര ലക്ഷം രൂപ ശമ്പളം, പാചകക്കാരനെ തേടിയലഞ്ഞ് റൊണാൾഡോ

പോർച്ചുഗൽ താരമായ ക്രിസ്റ്റ്യാനോ റൊണാൾഡോ, സൗദി അറേബ്യ കേന്ദ്രമായി പ്രവർത്തിക്കുന്ന ഫുട്‌ബോൾ ക്ലബ്ബായ അൽനാസറിൽ അടുത്തിടെയാണ് അംഗമായത്. ഇവിടേക്ക് അനുയോജ്യനായ ഒരു പാചകക്കാരനെ കണ്ടെത്താനാകാതെ വിഷമിക്കുകയാണ് താരമിപ്പോൾ. 4500 പൗണ്ട് (ഏകദേശം 4.52 ലക്ഷം രൂപ) ആണ് ശമ്പളമായി വാഗ്ദാനം ചെയ്തിരിക്കുന്നത്.
റൊണാൾഡോയും പങ്കാളി ജോർജിന റോഡ്രിഗസും മുന്നാട്ടു വച്ച നിബന്ധനകളാണ് പാചകക്കാരനെ ലഭിക്കാത്തതിനു കാരണമെന്നാണ് റിപ്പോർട്ട്. പോർച്ചുഗീസ് ഭക്ഷണങ്ങളും രാജ്യാന്തര വിഭവങ്ങളും ഒരുപോലെ തയ്യാറാക്കുന്ന പാചകക്കാരനെയാണ് അദ്ദേഹത്തിന് ആവശ്യം. കടൽ മത്സ്യങ്ങളും ജാപ്പനീസ് വിഭവമായ സുഷിയും ഉണ്ടാക്കാൻ അറിഞ്ഞിരിക്കണം.
ഫുട്‌ബോളിൽ നിന്ന് വിരമിക്കുമ്പോൾ പോർച്ചുഗലിൽ തന്നെ താമസിക്കാനാണ് റൊണാൾഡോ തീരുമാനിച്ചിരിക്കുന്നത്. ഇതിനായി ഒരു ആഡംബര വീടും അദ്ദേഹം നിർമ്മിക്കുന്നുണ്ട്.