2024ല്‍ കസറാന്‍ കാത്തിരിക്കുന്ന മലയാള സിനിമകള്‍

2024ല്‍ വ്യത്യസ്ത കഥാപാത്രങ്ങളുമായി മലയാള താരങ്ങള്‍

പുത്തന്‍ പ്രതീക്ഷകളുമായി ജനങ്ങള്‍ പുതുവര്‍ഷത്തെ വരവേല്‍ക്കാന്‍ ഒരുങ്ങുമ്പോള്‍ മലയാള സിനിമയില്‍ വരാന്‍ പോകുന്നത് ഒരു കൂട്ടം മികച്ച സിനിമകളാണ്. 2024ല്‍ ഏറെ പ്രതീക്ഷയോടെ കാത്തിരിക്കുന്ന ഏതാനും ചില സിനിമകളിതാ…

1 മലൈക്കോട്ടൈ വാലിബന്‍

യുവ സംവിധായക നിരയില്‍ ശ്രദ്ധേയനായ ലിജോ ജോസ് പെല്ലിശ്ശേരി ഒരുക്കുന്ന ചിത്രമാണിത്. നായകനായി എത്തുന്നത് മലയാളത്തിന്റെ സ്വന്തം മോഹന്‍ലാലും. ഇതുവരെ കാണാത്ത വേഷത്തില്‍ മോഹന്‍ലാല്‍ എത്തുന്നു എന്നതും ചിത്രത്തിന്റെ മറ്റൊരു പ്രത്യേകതയാണ്. സിനിമയിലൂടെ മോഹന്‍ലാലിന്റെ ഒരു വമ്പന്‍ തിരിച്ചു വരവിനായി കാത്തിരിക്കുകയാണ് ആരാധകര്‍. സോണാലി കുല്‍ക്കര്‍ണി, ഡാനിഷ് സെയ്ത്, മണികണ്ഠന്‍ ആര്‍ ആചാരി, ഹരിപ്രശാന്ത് വര്‍മ, ഹരീഷ് പേരടി, കഥ നന്ദി, രാജീവ് പിള്ള, സുചിത്ര നായര്‍ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

2 ആടുജീവിതം

ബ്ലസിയുടെ സംവിധാനത്തില്‍ പൃഥ്വിരാജ് നായകനാകുന്ന ചിത്രം ബെന്യാമിന്റെ നോവലായ ആടുജീവിതത്തിന്റെ ദൃശ്യാവിഷ്‌കാരമാണ്. ചിത്രത്തില്‍ പൃഥ്വിരാജ് നടത്തിയ ട്രാന്‍സ്‌ഫോമേഷന്‍ ഏറെ ശ്രദ്ധിക്കപ്പെട്ടിരുന്നു. മലയാള സിനിമയെ മറ്റൊരു തലത്തില്‍ എത്തിക്കാന്‍ ഉതകുന്ന സിനിമയെന്ന് ഏവരും വിലയിരുത്തുന്ന ആടുജീവിതം 2024 ഏപ്രില്‍ 10ന് തിയറ്ററില്‍ എത്തും.

3 അജയന്റെ രണ്ടാം മോഷണം

യുവതാര നിരയില്‍ ശ്രദ്ധേയനായ ടൊവിനോ തോമസ് ചിത്രമാണ് ‘അജയന്റെ രണ്ടാം മോഷണം’. ജിതിന്‍ ലാലിന്റെ സംവിധാനത്തില്‍ ഒരുങ്ങുന്ന ബിഗ് ബജറ്റ് ചിത്രം പൂര്‍ണമായും ത്രീഡിയിലാണ് അവതരിപ്പിക്കുന്നത്. ചിത്രത്തില്‍ ട്രിപ്പിള്‍ റോളിലാണ് ടൊവിനോ എത്തുന്നത്. കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് നായികമാര്‍. ടൊവിനോയുടെ കരിയറില്‍ ഏറെ പ്രതീക്ഷയുള്ള ചിത്രം കൂടിയാണിത്. 2024 ജനുവരി 19ന് ചിത്രം തീയറ്ററില്‍ എത്തും.

4 ഭ്രമയുഗം

സമീപകാലത്ത് വ്യത്യസ്ത കഥാപാത്രങ്ങള്‍ ചെയ്ത് കയ്യടി നേടുന്ന മമ്മൂട്ടിയുടെ മറ്റൊരു പകര്‍ന്നാട്ട ചിത്രമാണ് ‘ഭ്രമയുഗം’. ഹൊറോര്‍ ജോണറില്‍ ഒരുങ്ങുന്ന ചിത്രത്തില്‍ മമ്മൂട്ടി നെഗറ്റീവ് ഷേഡുള്ള കഥാപാത്രത്തെയാണ് അവതരിപ്പിക്കുക. രാഹുല്‍ സദാശിവന്‍ സംവിധാനം ചെയ്യുന്ന ചിത്രം 2024 ജനുവരി ആദ്യവാരും റിലീസ് ചെയ്യുമെന്നാണ് വിവരം.

5 ബറോസ്

മോഹന്‍ലാല്‍ ആദ്യമായി സംവിധാനം ചെയ്യുന്ന ചിത്രമാണ് ബറോസ്. കാലങ്ങളായുള്ള അഭിനയ ജീവിതത്തില്‍ നിന്നും ആര്‍ജ്ജിച്ചെടുത്ത കരവിരുതുമായി മോഹന്‍ലാല്‍ എത്തുമ്പോള്‍ പ്രതീക്ഷ ഏറെയാണ്. 2024 മാര്‍ച്ച് 28ന് ചിത്രം തിയറ്ററില്‍ എത്തും. ത്രീഡിയില്‍ ഒരുങ്ങുന്ന ചിത്രത്തില്‍ പാസ് വേഗ, റാഫേല്‍ അമാര്‍ഗോ തുടങ്ങി സ്പാനിഷ് താരങ്ങളും അഭിനയിക്കുന്നുണ്ട്.

6 കത്തനാര്‍

റോജിന്‍ തോമസിന്റെ സംവിധാനത്തില്‍ ജയസൂര്യ നായകനായി എത്തുന്ന ചിത്രമാണ് കത്തനാര്‍. ഗോകുലം ഗോപാലന്‍ നിര്‍മിക്കുന്ന മലയാളത്തിലെ ഏറ്റവും വലിയ മുതല്‍ മുടക്കുള്ള ചിത്രത്തിന്റെ ഷൂട്ടിംഗ് പുരോഗമിക്കുകയാണ്. 2024ല്‍ തന്നെ സിനിമ റിലീസ് ചെയ്യുമെന്നാണ് വിവരം. അനുഷ്‌ക ഷെട്ടിയാണ് നായിക കഥാപാത്രത്തെ അവതരിപ്പിക്കുക.

7 എമ്പുരാന്‍

2024ല്‍ റിലീസ് ചെയ്യുമെന്ന് ഏവരും പ്രതീക്ഷയോടെ കാത്തിരിക്കുന്ന സിനിമകളില്‍ ഒന്നാണ് എമ്പുരാന്‍. പൃഥ്വിരാജ് സംവിധാനം ചെയ്ത് സൂപ്പര്‍ ഹിറ്റായി മാറിയ ലുസിഫറിന്റെ രണ്ടാം ഭാഗമാണിത്. മോഹന്‍ലാല്‍ നായകനായി എത്തുന്ന ചിത്രത്തിന്റെ ഷൂട്ടിംഗ് പുരോഗമിക്കുകയാണ്. ലൈക്ക പ്രൊഡക്ഷന്‍സും ആശിര്‍വാദ് സിനിമാസുമാണ് നിര്‍മ്മാണം. ടൊവിനോ തോമസ്, മഞ്ജു വാര്യര്‍, ഇന്ദ്രജിത്ത്, ബൈജു തുടങ്ങിയവര്‍ സിനിമയില്‍ ഉണ്ടാകും എന്നാണ് വിവരം. എന്നാല്‍ 2025ല്‍ റിലീസ് ചെയ്യുമെന്നും റിപ്പോര്‍ട്ടുണ്ട്.

8 വര്‍ഷങ്ങള്‍ക്ക് ശേഷം

വിനീത് ശ്രീനിവാസന്റെ സംവിധാനത്തില്‍ പ്രണവ് മോഹന്‍ലാലും കല്യാണി പ്രിയദര്‍ശനും ഒന്നിക്കുന്ന ചിത്രമാണ് ‘വര്‍ഷങ്ങള്‍ക്ക് ശേഷം’.
നിവിന്‍ പോളി, ധ്യാന്‍ ശ്രീനിവാസന്‍, അജു വര്‍ഗീസ്, ബേസില്‍ ജോസഫ്, നീരജ് മാധവ് തുടങ്ങിയവരും സിനിമയില്‍ ഭാഗമാകുന്നുണ്ട്. ഒക്ടോബറില്‍ ചിത്രീകരണം ആരംഭിച്ച ചിത്രം അടുത്ത വര്‍ഷം റിലീസ് ചെയ്യുമെന്നാണ് കരുതപ്പെടുന്നത്.

9 ഓസ്‌ലര്‍

മിഥുന്‍ മാനുവല്‍ തോമസിന്റെ സംവിധാനത്തില്‍ ഇന്‍വെസ്റ്റിഗേഷന്‍ ഗണത്തില്‍പ്പെട്ട ചിത്രമാണ് ‘ഓസ്‌ലര്‍’. ജയറാം നായകനായി എത്തുന്ന ചിത്രം 2024 ജനുവരി 11ന് തിയറ്ററില്‍ എത്തും. ഡോ. രണ്‍ധീര്‍ കൃഷ്ണന്‍ ആണ് തിരക്കഥ ഒരുക്കിയിരിക്കുന്നത്.

ഈ പറഞ്ഞ സിനിമകള്‍ കൂടാതെ ദിലീപ് ചിത്രം തങ്കമണി, മോഹന്‍ലാല്‍ സിനിമകളായ റമ്പാന്‍, വൃഷഭ, മമ്മൂട്ടി ചിത്രങ്ങളായ ബസൂക്ക, ടര്‍ബോ, ടൊവിനോയുടെ നടികര്‍ തിലകം തുടങ്ങിയവ 2024ല്‍ റിലീസ് ചെയ്‌തേക്കാം.