യൂണിഫോമില്‍ മദ്യപിച്ച് നൃത്തം ചെയ്ത എ.എസ്.ഐക്ക് സസ്‌പെന്‍ഷന്‍

ഇടുക്കി: ഉത്സവത്തിനിടെ മദ്യപിച്ച് നൃത്തം ചെയ്ത എ.എസ്.ഐക്ക് സസ്‌പെന്‍ഷന്‍. ഇടുക്കി ശാന്തന്‍പാറ അഡീഷണല്‍ എസ്.ഐ കെ.പി.ഷാജിയാണ് സസ്‌പെന്‍ഷനില്‍ ആയത്. കൃത്യനിര്‍വഹണത്തിനിടയില്‍ യൂണിഫോമില്‍ മദ്യപിച്ച് നൃത്തം ചെയ്യുകയായിരുന്നു. വീഡിയോ ദൃശ്യങ്ങള്‍ സാമൂഹ്യമാധ്യമങ്ങളില്‍ പ്രചരിച്ചതിനെത്തുടര്‍ന്നാണ് സസ്‌പെന്‍ഷന്‍.

പൂപ്പാറ മാരിയമ്മന്‍ ക്ഷേത്രത്തിലെ ഉത്സവത്തിനിടെയായിരുന്നു സംഭവം. ഉത്സവത്തോടനുബന്ധിച്ച് നടന്ന ഗാനമേളയ്ക്കിടെയാണ് എ.എസ്.ഐ നൃത്തം ചെയ്തത്. ഒടുവില്‍ നാട്ടുകാരാണ് അദ്ദേഹത്തെ പിന്തിരിപ്പിച്ചത്.

നൃത്തം ചെയ്തതിന്റെ വീഡിയോ പ്രചരിച്ചതിനെത്തുടര്‍ന്ന് സ്‌പെഷല്‍ ബ്രാഞ്ച് അന്വേഷണം നടത്തിയിരുന്നു. മൂന്നാര്‍ ഡിവൈഎസ്പിയുടെയും സ്‌പെഷല്‍ ബ്രാഞ്ചിന്റെയും റിപ്പോര്‍ട്ടിന്റെ അടിസ്ഥാനത്തില്‍ എറണാകുളം റേഞ്ച് ഡിഐജിയാണ് സസ്‌പെന്‍ഡ് ചെയ്തത്.