സണ്ണി ലിയോണിയുടെ ആദ്യ മലയാളം ത്രില്ലര്‍ സീരീസ് വരുന്നു

ബോളിവുഡ് സൂപ്പര്‍ താരം സണ്ണി ലിയോണിയുടെ ‘പാന്‍ ഇന്ത്യന്‍ സുന്ദരി’ വരുന്നു. മലയാളം വെബ് സീരിസാണ് ‘പാന്‍ ഇന്ത്യന്‍ സുന്ദരി’. കഥയും സംവിധാനവും സതീഷ് നിര്‍വഹിക്കുന്ന ‘പാന്‍ ഇന്ത്യന്‍ സുന്ദരി’ മലയാളത്തിലെ ആദ്യത്തെ ബിഗ് ബഡ്ജറ്റ് കോമഡി ആക്ഷന്‍ ത്രില്ലര്‍ സീരിസാണ്. hr പ്രൊഡക്ഷസിന്റെ ബാനറില്‍ ശ്രീന പ്രതാപനാണ് സീരീസ് നിര്‍മ്മിക്കുന്നത്. ഹൈ റിച്ച് ഗ്രൂപ്പിന്റെ എച്ച് ആര്‍ ഒടിടിയിലൂടെ പ്രദര്‍ശനത്തിനെത്തുന്ന സീരീസില്‍ നായികാ നായകന്മാരായി എത്തുന്നത് അപ്പാനി ശരത്തും മാളവികയും. മണിക്കുട്ടന്‍, ജോണി ആന്റണി, ജോണ്‍ വിജയ്, ഭീമന്‍ രഘു, സജിത മഠത്തില്‍, കോട്ടയം രമേശ്, അസീസ് നെടുമങ്ങാട്, ഹരീഷ് കണാരന്‍, നോബി മര്‍ക്കോസ് തുടങ്ങി വലിയ താരനിര തന്നെ അണിനിരക്കുന്നുണ്ട്. മലയാളം തമിഴ് കന്നഡ തെലുങ്ക് ഹിന്ദി എന്നീ ഭാഷകളിലായി റിലീസ് ചെയ്യുന്ന സീരീസിന്റെ തിരക്കഥ ഒരുക്കിയിരിക്കുന്നത് പ്രിന്‍സി ഡെന്നിയും ലെനിന്‍ ജോണിയും ചേര്‍ന്നാണ്.