അഭിമുഖത്തിനിടെ തര്‍ക്കിച്ച് ഷൈന്‍

പുരുഷന്മാര്‍ക്ക് കാരവാന്‍, സ്ത്രീകള്‍ക്ക് ബാത്ത്‌റൂം പോലുമില്ല

കമല്‍ സംവിധാനം നിര്‍വഹിച്ച് ഷൈന്‍ ടോം ചാക്കോ കേന്ദ്ര കഥാപാത്രമായി എത്തുന്ന ചിത്രമാണ് വിവേകാനന്ദന്‍ വൈറലാണ്. സ്വാസിക, ഗ്രേസ് ആന്റണി, മറീന മൈക്കിള്‍ എന്നവരും പ്രധാന വേഷത്തില്‍ എത്തുന്നുണ്ട്. ചിത്രത്തിന്റെ പ്രൊമോഷന്‍ പരിപാടികളുടെ തിരക്കിലാണ് താരങ്ങളെല്ലാം. അതേസമയം പ്രൊമോഷന്റെ ഭാഗമായി നടന്ന അഭിമുഖത്തില്‍ നിന്നുള്ള ഒരു വീഡിയോ സമൂഹമാദ്ധ്യമങ്ങളില്‍ വൈറലാവുകയാണ്. ഷൈനുമായുള്ള തര്‍ക്കത്തെ തുടര്‍ന്ന് അഭിമുഖത്തില്‍ നിന്നും ഇറങ്ങി പോകുന്ന മറീനയുടേതാണ് വീഡിയോ. സിനിമയില്‍ സ്ത്രീകള്‍ അനുഭവിക്കുന്ന പ്രശ്‌നങ്ങളെ കുറിച്ച് നടി മറീന സംസാരിക്കുകയായിരുന്നു.

പ്രതിഫലം ചോദിച്ചപ്പോള്‍ തനിക്കെതിരെ പ്രൊഡ്യൂസേഴ്‌സ് അസോസിയേഷനില്‍ വരെ പരാതി നല്‍കി എന്നാണ് മറീന പറയുന്നത്. ‘ഒരു സിനിമയില്‍ അഭിനയിക്കുമ്പോള്‍ ശ്വാസമെടുക്കാന്‍ പറ്റാത്തത് പോലെ ബുദ്ധിമുട്ട് വന്നു. നാല് ദിവസം ബെഡ് റെസ്റ്റ് എടുക്കാന്‍ ഡോക്ടര്‍ പറഞ്ഞെങ്കിലും ഒരു ദിവസമാണ് കിട്ടിയത്. ആദ്യ ഷെഡ്യൂള്‍ കഴിഞ്ഞ ഉടനെ ഞാന്‍ പ്രതിഫലം കിട്ടുമോന്ന് ചോദിച്ചതോടെ അവര്‍ പ്രശ്‌നമാക്കി.പ്രമുഖ നടനുവേണ്ടി കുറേ നാള്‍ കാത്തിരുന്നു, പേര് ഞാന്‍ ഇവിടെ പറയുന്നില്ല’

സിനിമ തുടങ്ങിയ ഉടനെ പ്രതിഫലം ചോദിക്കാന്‍ ഇവളാരാണെന്ന് ചോദിച്ച് അവര്‍ പ്രൊഡ്യൂസേഴ്‌സ് അസോസിയേഷനില്‍ പരാതി കൊടുത്തു. ഇതൊരു പുരുഷന്‍ ആയിരുന്നെങ്കില്‍ ആദ്യം അദ്ദേഹവുമായി പ്രശ്‌നത്തെ കുറിച്ച് സംസാരിക്കും. പക്ഷേ സ്ത്രീയായത് കൊണ്ടാണ് അങ്ങനെ ചെയ്യാത്തത്. അതുപോലെ വേറൊരു സിനിമയുടെ ലൊക്കേഷനില്‍ പുരുഷന്മാര്‍ക്ക് കാരവനും ഞാന്‍ അടക്കമുള്ള സ്ത്രീകള്‍ക്ക് ബാത്ത്‌റൂം സൗകര്യം പോലുമില്ലാത്ത മുറിയാണ് തന്നത് മറീന പറഞ്ഞു.

പിന്നാലെ ഷൈനും മെറീനയും തമ്മില്‍ വാക്കുതര്‍ക്കമായി. പുരുഷന്മാരെ ഒന്നടങ്കം അടിച്ചാക്ഷേപിക്കരുതെന്നും മറീനയുടെ ആരോപണത്തില്‍ ഉള്ള നടന്മാര്‍ ആരൊക്കെയാണെന്ന് വെളിപ്പെടുത്തണമെന്നും ഷൈന്‍ ആവശ്യപ്പെട്ടു. വീണ്ടും മറീന സമാനമായ കാര്യം വിശദീകരിച്ചതോടെ രൂക്ഷമായ ഭാഷയില്‍ നടന്‍ ബഹളമുണ്ടാക്കി. പുരുഷന്‍മാര്‍ എന്ന് പറഞ്ഞാല്‍ തന്നെയടക്കം ബാധിക്കുമെന്നാണ് ഷൈന്‍ പറഞ്ഞത്.
അഭിമുഖത്തില്‍ ഷൈന്‍ വീണ്ടും ഒച്ചയെടുത്ത് സംസാരിച്ചതോടെ മറീന അഭിമുഖത്തില്‍ നിന്നും എഴുന്നേറ്റ് പോവുകയായിരുന്നു. എന്നാല്‍ ക്യാമറ ഓഫാക്കിയതിന് ശേഷം നടിയ്ക്ക് പ്രതികരിക്കാനുള്ള അവസരം കൊടുക്കുകയും ആശയം വിശദമാക്കുകകയും ചെയ്തതിന് ശേഷം വീണ്ടും അഭിമുഖത്തിലേക്ക് തിരികെ കൊണ്ട് വരികയും ചെയ്തിരുന്നു.

ജനുവരി 19നാണ് വിവേകാനന്ദന്‍ വൈറലാണ് ചിത്രം റിലീസ് ചെയ്യുന്നത്. നെടിയത്ത് പ്രൊഡക്ഷന്‍സിന്റെ ബാനറില്‍ നെടിയത്ത് നസീബും പി.എസ്. ഷെല്ലി രാജും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രത്തിന്റെ രചനയും കമല്‍ തന്നെയാണ് നിര്‍വഹിച്ചിരിക്കുന്നത്. ചിത്രത്തിന്റെ ഛായാഗ്രഹണം പ്രകാശ് വേലായുധനും എഡിറ്റിംഗ് രഞ്ജന്‍ എബ്രഹാമും നിര്‍വഹിക്കുന്നു. ബി.കെ. ഹരിനാരായണന്റെ വരികള്‍ക്ക് സംഗീതം പകരുന്നത് ബിജിബാലാണ്.