മോഹൻലാൽ -ജിത്തു ജോസഫ് കൂട്ടുകെട്ട് വീണ്ടും 

മോഹൻലാൽ നായകനാകുന്ന ജിത്തു ജോസഫ് ചിത്രം – പ്രഖ്യാപനവുമായി ആന്റണി പെരുമ്പാവൂർ

വിജയ ജോഡികളായ മോഹൻലാലും ജിത്തു ജോസഫും വീണ്ടും ഒന്നിക്കുന്നു. മോഹൻലാലിനെ നായകനാക്കി ജിത്തു ജോസഫ് സംവിധാനം ചെയ്യുന്ന പുതിയ ചിത്രം നിർമ്മിക്കുന്നത് ആന്റണി പെരുമ്പാവൂരാണ്. ആന്റണി പെരുമ്പാവൂർ തന്നെയാണ് ഇക്കാര്യം തന്റെ ഫെയ്സ്ബുക്കിലൂടെ പ്രേക്ഷകരെ അറിയിച്ചത്. ആശീർവാദ് സിനിമാസിന്റെ മുപ്പത്തിമൂന്നാമത്തെ ചിത്രമാണിത്. ചിത്രത്തിന്റെ കൂടുതൽ വിവരങ്ങളൊന്നും പുറത്തുവിട്ടിട്ടില്ല. ഓഗസ്റ്റിൽ ചിത്രീകരണം തുടങ്ങും.

മോഹൻലാൽ – ജിത്തു കൂട്ടുകെട്ടിൽ വിരിഞ്ഞ ദൃശ്യം വൻ വിജയമായിരുന്നു. അതുകൊണ്ടു തന്നെ വലിയ പ്രതീക്ഷയിലാണ് ആരാധകർ. മോഹൻലാലിനെ നായകനാക്കി ജിത്തു ജോസഫ് നിർമ്മിക്കുന്ന അഞ്ചാമത്തെ ചിത്രമാണിത്. ദൃശ്യം, ദൃശ്യം 2, ട്വൽത്ത് മാൻ , റാം എന്നിവയാണ് മറ്റ് ചിത്രങ്ങൾ. ഇതിൽ റാം എന്ന സിനിമയുടെ ചിത്രീകരണം അവസാന ഘട്ടത്തിലാണ്. പുതിയ സിനിമയുടെ പ്രഖ്യാപനം ലാൽ ആരാധകരെ ആവേശത്തിലാഴ്ത്തിയിരിക്കുകയാണ്.