കൊച്ചിയിലെ വിഷപ്പുകയില്‍ ആശങ്കയോടെ മോഹന്‍ലാല്‍

പൊഖ്‌റാന്‍ : ബ്രഹ്മപുരത്തില്‍ നിന്നും രൂപപ്പെട്ട് കൊച്ചിയില്‍ നിറഞ്ഞ വിഷപ്പുകയില്‍ ആശങ്ക പങ്കുവെച്ച് മലയാളത്തിന്റെ പ്രിയ നടന്‍ മോഹന്‍ലാല്‍.

‘ഞാനീ കുറിപ്പ് എഴുതുന്നത് രാജസ്ഥാനിലെ പൊഖ്‌റാന്‍ മരുഭൂമിയില്‍ ഇരുന്നാണ്. കൊടുംചൂടാണ് എന്നതൊഴിച്ചാല്‍ ഇവിടെ കാറ്റും വെളിച്ചവുമെല്ലാം പ്രസന്നമാണ്; ശുദ്ധമാണ്. എന്നാല്‍, അതൊന്നും ആസ്വദിക്കാന്‍ എനിക്കിപ്പോള്‍ തോന്നുന്നില്ല. കാരണം, എന്റെ അമ്മ കൊച്ചിയിലാണുള്ളത്. വിഷപ്പുക അമ്മ കിടക്കുന്ന മുറിയിലുമെത്തുമോ എന്ന ഭയം എന്നെ വേട്ടയാടുന്നു.

കൊച്ചിയിലെ ഒരുപാട് അമ്മമാരെയും അച്ഛന്മാരെയും കാണുന്നു. അതിനപ്പുറമുള്ള വ്യര്‍ഥമായ രാഷ്ട്രീയ യുദ്ധകോലാഹലങ്ങളുടെ ശബ്ദം കേള്‍ക്കുന്നു.

എന്റെ ബ്ലോഗുകളില്‍ ഏറ്റവുമധികം ആശങ്കയോടെ ഞാന്‍ അവതരിപ്പിച്ചത് മാലിന്യ പ്രശ്‌നമായിരുന്നു. അതിനെ ശ്രദ്ധിക്കുന്നതിലധികം പഴിക്കുന്നതിലാണ് ഒരു വലിയവിഭാഗം രസം കണ്ടത്. ബ്രഹ്മപുരത്തെക്കുറിച്ച് വായിക്കുമ്പോള്‍ ഞാനെന്റെ പാഴായിപ്പോയ കുറിപ്പുകളെക്കുറിച്ച് ഓര്‍ത്തുപോവുന്നു.

കേരളത്തിന്റെ ജനസാന്ദ്രത മറ്റുസംസ്ഥാനങ്ങളെക്കാള്‍ പതിന്മടങ്ങാണ്. അതിനാല്‍, നമ്മുടെ സംസ്ഥാനത്തെയും മഹാനഗരങ്ങളിലെയും മാലിന്യപ്രശ്‌നം പ്രത്യേകമായി പഠിക്കപ്പെടുകയും പരിഹാരം കാണേണ്ടതുമാണ്’ അദ്ദേഹം കുറിപ്പില്‍ പറഞ്ഞു.