ലോകകപ്പ് ജേതാക്കളായ അർജന്റീന ടീമിന് മെസ്സിയുടെ സമ്മാനം

ലോകകപ്പും അതിനു പിന്നാലെ ഫിഫയുടെ മികച്ച താരത്തിനുള്ള പുരസ്‌കാരവും നേടി ലോകത്തിന്റെ നെറുകയിലാണ് അർജന്റീന സൂപ്പർ താരം ലയണൽ മെസ്സി.

ഖത്തർ ലോകകപ്പ് വിജയം മെസ്സിയുടെ കരിയറിലെ മാത്രമല്ല ജീവിതത്തിലെ തന്നെ ഏറ്റവും വലിയ നേട്ടമായിരുന്നു. ഇപ്പോഴിതാ ഖത്തറിൽ കിരീടമുയർത്തിയ അർജന്റീന ടീമിലെ കളിക്കാർക്കും സപ്പോർട്ട് സ്റ്റാഫിനും സ്വർണ ഐഫോണുകൾ സമ്മാനമായി നൽകാനൊരുങ്ങുകയാണ് മെസ്സി. ഇതിനായി സ്വർണത്തിൽ പൊതിഞ്ഞ 35 ഐഫോണുകൾ മെസ്സി വാങ്ങിയതായി റിപ്പോർട്ട് ചെയ്യുന്നു.

24 കാരറ്റ് വരുന്ന 35 ഐഫോണുകൾക്ക് 175,000 പൗണ്ട് ഏകദേശം 1.73 കോടി രൂപ ആണ് വില. ഓരോ കളിക്കാരന്റെയും പേരും ജേഴ്‌സി നമ്പറും അർജന്റീനയുടെ ലോഗോയും പതിപ്പിച്ച പ്രത്യേക ഐഫോണുകളാണിത്. ഇവ ശനിയാഴ്ച പാരിസിൽ മെസ്സിയുടെ താമസ സ്ഥലത്ത് എത്തിച്ചിട്ടുണ്ട്.

ഐ ഡിസൈൻ ഗോൾഡ് എന്ന സ്ഥാപനമാണ് മെസ്സിക്ക് വേണ്ടി സ്വർണ ഐഫോണുകൾ ഡിസൈൻ ചെയ്തത്.

”മെസ്സി ഐ ഡിസൈൻ ഗോൾഡിന്റെ ഏറ്റവും വിശ്വസ്തരായ ഉപഭോക്താക്കളിൽ ഒരാളാണ്. ലോകകപ്പ് ഫൈനൽ കഴിഞ്ഞ് ഏതാനും ആഴ്ചകൾക്ക് ശേഷം അദ്ദേഹം ഞങ്ങളുമായി ബന്ധപ്പെട്ടു. ഈ ചരിത്ര വിജയം ആഘോഷിക്കാൻ എല്ലാ കളിക്കാർക്കും സ്റ്റാഫിനും എന്തെങ്കിലും ഒരു പ്രത്യേക സമ്മാനം നൽകാൻ താൻ ആഗ്രഹിക്കുന്നതായി അറിയിച്ചു. സാധാരണ ചെയ്യുന്നതു പോലെ വാച്ചുകൾ സമ്മാനമായി നൽകാൻ ഉദ്ദേശിക്കുന്നില്ലെന്നും വ്യക്തമാക്കി. അതിനാൽ അവരുടെ പേരുകൾ ആലേഖനം ചെയ്ത സ്വർണ ഐഫോണുകൾ നൽകാമെന്ന് താൻ നിർദേശിക്കുകയായിരുന്നു. അദ്ദേഹത്തിന് ആ ആശയം ഇഷ്ടമായി ‘ എന്നും ഐ ഡിസൈൻ ഗോൾഡ് സിഇഒ ബെൻ ലയൺസ് പറഞ്ഞു.