കാതലിലെ സുധിക്ക് അഭിനന്ദന സന്ദേശവുമായി ഗൗതം മേനോന്‍

മുന്‍പ് കേരളത്തിന് പുറത്ത് ചെറിയ റീച്ച് മാത്രം ഉണ്ടായിരുന്ന മലയാള ചിത്രങ്ങള്‍ക്ക് ഇന്ന് ഇന്ത്യയിലെമ്പാടും പ്രേക്ഷകരുണ്ട്. ഒടിടി റിലീസിലൂടെ ഏറ്റവുമൊടുവില്‍ വലിയ ചര്‍ച്ച സൃഷ്ടിച്ചിരിക്കുന്ന ചിത്രം കാതല്‍ ആണ്. തിയറ്റര്‍ റിലീസിന്റെ സമയത്ത് മലയാളികള്‍ ഇരുകൈയും നീട്ടി സ്വീകരിച്ച ചിത്രം ഒടിടി റിലീസിന് ശേഷം മറുഭാഷാ പ്രേക്ഷകരും ഏറ്റെടുത്തിരിക്കുകയാണ്. പ്രേക്ഷകര്‍ക്കൊപ്പം നിരവധി പ്രശസ്തരും ചിത്രത്തെ അഭിനന്ദിച്ച് രംഗത്തെത്തിയിരുന്നു. സംവിധായകന്‍ ഗൗതം മേനോനും അക്കൂട്ടത്തിലുണ്ട്. കാതല്‍ കണ്ട് ചിത്രത്തിലെ പ്രധാന കഥാപാത്രങ്ങളിലൊന്നായ തങ്കനെ അവതരിപ്പിച്ച സുധി കോഴിക്കോടിന് മെസേജ് അയക്കുകയായിരുന്നു ഗൗതം മേനോന്‍. ‘ഹായ് സുധി, സിനിമ ഞാന്‍ കണ്ടു. എനിക്ക് വളരെ ഇഷ്ടമായി. നിങ്ങളും നന്നായി ചെയ്തിട്ടുണ്ട്. വളരെ ശക്തവും അതേസമയം സൂക്ഷ്മവുമായ ചിത്രമാണിത്. ഒത്തിരി ഇഷ്ടപ്പെട്ടു എനിക്ക്’, എന്നാണ് ഗൗതം മേനോന്‍ സുധിക്ക് അയച്ച സന്ദേശം. രാജ് ബി ഷെട്ടി, ഹന്‍സല്‍ മെഹ്ത, ദിവ്യ ദര്‍ശിനി, ശ്രേയ ധന്വന്തരി, ജി ധനഞ്ജയന്‍ തുടങ്ങിയ നിരവധി പേര്‍ കാതലിനെ അഭിനന്ദിച്ച് സോഷ്യല്‍ മീഡിയയില്‍ പോസ്റ്റ് ചെയ്തിരുന്നു.