ചെന്നൈ വെള്ളപ്പൊക്കം; അഭ്യര്‍ത്ഥനയുമായി വിജയ്.

ചെന്നൈയിലെ വെള്ളപ്പൊക്കം സാരമായിത്തന്നെയാണ് ജനജീവിതത്തെ ബാധിച്ചത്. വിവിധ മേഖലകളില്‍ നിന്നുള്ളവര്‍ ദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട് രംഗത്തുണ്ട്. അത്തരമൊരു ആളാണ് നടന്‍ വിജയ്. ദുരിതാശ്വാസപ്രവര്‍ത്തനങ്ങളില്‍ സജീവമായുണ്ടാവണമെന്ന് തന്റെ ആരാധക സംഘടനകളോട് ആവശ്യപ്പെട്ടിരിക്കുകയാണ് താരം ഇപ്പോള്‍. ട്വിറ്ററിലൂടെയാണ് സന്നദ്ധ സേവനത്തിനിറങ്ങണമെന്ന് വിജയ്, ആരാധകരോട് നിര്‍ദേശിച്ചത്. സര്‍ക്കാരുമായി ചേര്‍ന്ന് ദുരിതാശ്വാസപ്രവര്‍ത്തനങ്ങള്‍ക്ക് സ്വമനസ്സാലെ ഇറങ്ങണമെന്ന് താരം ആവശ്യപ്പെട്ടു. നമുക്ക് കൈകോര്‍ത്ത് ഒരുമിച്ച് വിഷമങ്ങള്‍ തുടച്ചുനീക്കാം എന്നും വിജയ് ട്വിറ്ററില്‍ പോസ്റ്റ് ചെയ്തു..മിഷോങ് ചുഴലിക്കാറ്റിനേത്തുടര്‍ന്നുണ്ടായ കനത്ത മഴയില്‍ പൊതുജനങ്ങള്‍ ഏറെ ബുദ്ധിമുട്ടുകയാണ്. വെള്ളവും ഭക്ഷണവുമില്ലാതെയും മതിയായ അടിസ്ഥാന സൗകര്യങ്ങളില്ലാതെയും ആയിരകണക്കിന് ആളുകള്‍ ദുരിതമനുഭവിക്കുന്നതായി റിപ്പോര്‍ട്ടുകളുണ്ട്. വെള്ളപ്പൊക്കത്തില്‍ നിന്ന് കരകയറാന്‍ സഹായിക്കണമെന്ന് സോഷ്യല്‍ മീഡിയയിലൂടെയും നിരവധിപേര്‍ അഭ്യര്‍ത്ഥിക്കുന്നു. ഈ വേളയില്‍, ദുരിതബാധിത പ്രദേശങ്ങളിലെ ജനങ്ങളെ സഹായിക്കുന്നതിനായി രക്ഷാപ്രവര്‍ത്തനത്തില്‍ സന്നദ്ധപ്രവര്‍ത്തകരായി ഇറങ്ങണമെന്ന് എല്ലാ വിജയ് മക്കള്‍ ഇയക്കം ഭാരവാഹികളോടും വിനീതമായി അഭ്യര്‍ത്ഥിക്കുന്നു. വിജയ് കുറിച്ചു.