കണ്ണൂരില്‍ കാര്‍ നിയന്ത്രണം വിട്ടു മറിഞ്ഞു; രണ്ട് പേര്‍ മരിച്ചു

കണ്ണൂര്‍: കണ്ണൂര്‍ മെരുവമ്പായില്‍ കാര്‍ അപകടത്തില്‍ രണ്ട് പേര്‍ മരിച്ചു. ഉരുവച്ചാല്‍ സ്വദേശികളായ അരവിന്ദാക്ഷന്‍(65), ചെറുമകന്‍ ഷാരോണ്‍(8) എന്നിവരാണ് മരിച്ചത്. എട്ട് പേര്‍ക്ക് പരിക്കേറ്റു.

കൂത്തുപറമ്പ് മട്ടന്നൂര്‍ റോഡില്‍ നിയന്ത്രണം വിട്ട കാര്‍ കലുങ്കില്‍ ഇടിച്ച് മറിയുകയായിരുന്നു. ഇന്ന് പുലര്‍ച്ചെ 3.30 ഓടെയാണ് അപകടം. പരിക്കേറ്റവരെ സ്വകാര്യ ആശുപത്രിയില്‍ പ്രവേശിപ്പിച്ചു.

വിദേശത്തു നിന്നും വന്ന ബന്ധുവിനെ കരിപ്പൂര്‍ വിമാനത്താവളത്തില്‍ നിന്നും കൂട്ടി കുടുംബമായി മട്ടന്നൂരിലേക്ക് വരുന്നതിനിടെയാണ് അപകടം. ഡ്രൈവര്‍ ഉറങ്ങിയതാണോ അപകടത്തിന് കാരണമെന്ന് സംശയമുണ്ട്. സംഭവത്തില്‍ പൊലീസ് അന്വേഷണം ആരംഭിച്ചു.