അറക്കല്‍ അബു വീണ്ടും വരും, ആട് 3ലൂടെ

2024ല്‍ ആട് 3 വരുമെന്നാണ് പ്രതീക്ഷ; സൈജു കുറുപ്പ്‌

മലയാളികള്‍ക്ക് പ്രിയപ്പെട്ട നടനാണ് സൈജു കുറുപ്പ്. ബാബാ കല്യാണി, ചോക്ലേറ്റ്, ഹെലോ, കൊഹിനൂര്‍, ലൂക്കാ ചൂപ്പി, ആക്ഷന്‍ ഹീറോ ബിജു, തുടങ്ങി നിരവധി ചിത്രങ്ങളിലൂടെ പ്രേക്ഷക ശ്രദ്ധ നേടിയ താരം. അദ്ദേഹത്തിന്റെ ജനപ്രിയ സിനിമകളില്‍ ഒന്നാണ് ജയസൂര്യ നായകനായ ആട്. 2015ല്‍ പുറത്തിറങ്ങിയ ചിത്രം ബോക്‌സ് ഓഫീസില്‍ ആദ്യം മോശം പ്രകയനമായിരുന്നു കാഴ്ച വെച്ചത് എങ്കിലും പിന്നീട് വലിയ പോസിറ്റീവായ പ്രതികരണമായിരുന്നു ലഭിച്ചത്. സംവിധാനവും രചനയും മിഥുന്‍ മാനുവല്‍ തോമസാണ്. സിനിമയുടെ രണ്ടാം ഭാഗമായ ആട്-2 2017ലാണ് പുറത്തിറങ്ങിയത്. സിനിമയില്‍ അറക്കല്‍ അബു എന്ന കഥാപാത്രത്തെയാണ് സൈജു അവതരിപ്പിച്ചത്.

അറക്കല്‍ അബുവിനെ പറ്റിയും ചിത്രത്തിന്റെ മൂന്നാം ഭാഗത്തെ പറ്റിയും സൈജു പറയുന്നതിങ്ങനെ. ‘ കുറേ കാലമായി ആളുകള്‍ ചോദിക്കുമ്പോള്‍ സിനിമയുടെ അടുത്ത ഭാഗം വരുമെന്ന് തന്നെയാണ് നമ്മള്‍ പറയുന്നത്. ആ കഥാപാത്രം ഇനിയും ഉണ്ടാകാന്‍ സാധ്യതയുണ്ട്. എന്നാല്‍ കഥ എഴുതുന്നത് ചെറിയ കാര്യമല്ല. ഒരു സിനിമ ഷൂട്ട് കഴിയുമ്പോള്‍ 20, 30 ദിവസം കൊണ്ട് അത് തീര്‍ക്കാന്‍ സാധിക്കും. അതേസമയം ഏറ്റവും കൂടുതല്‍ സമയം വെണ്ടത് എഴുതാനാണ്. ഈ വര്‍ഷമിറങ്ങിയ മിധുന്റെ സിനിമകള്‍ തന്നെ നോക്കിയാല്‍ മനസ്സിലാകും. ഗരുഡന്‍ ഹിറ്റായി. പിന്നാലെ ഫിനിക്‌സും വന്നു. മിഥുന്‍ തന്നെ സംവിധാനം ചെയ്യുന്ന പടം ഇനി ജനുവരിയില്‍ വരാനുണ്ട്. ഇതിന്റെ ഇടയില്‍ ആട് 3 എഴുതി തീര്‍ക്കാനുള്ള സമയം അവന് കിട്ടിയില്ല. എങ്കിലും അതിന്റെ പണിപ്പുരയില്‍ തന്നെയാണ്. കഥ എന്ന് പൂര്‍ത്തിയാകുന്നോ, അന്ന് സിനിമ ഷൂട്ടിങ് ആരംഭിക്കും. നമ്മള്‍ അഭിനേതാക്കളും പ്രൊഡ്യൂസറും ഇവിടെ റെഡിയാണ്. നമ്മളും 2024ല്‍ ആടിന്റെ അടുത്ത ഭാഗം പ്രതീക്ഷിക്കുന്നുണ്ട്. സൈജു പറഞ്ഞു.

ലാലേട്ടന്റെയും മമ്മൂക്കയുടെയും ഒപ്പമുള്ള നിമിഷങ്ങളും മറ്റും സൈജു പങ്കുവെച്ചു. മോഹന്‍ലാലിനൊപ്പമുള്ള ചിത്രങ്ങള്‍ ചെയ്തിട്ടുണ്ടെങ്കിലും അദ്ദേഹത്തോട് അധികം സംസാരിക്കാന്‍ കഴിഞ്ഞിട്ടില്ല. ദുല്‍ഖറിനെ പരിചയമുള്ളതുകൊണ്ട് അതുവഴി മമ്മൂട്ടിയോട് സംസാരിച്ചിട്ടുണ്ട്. എപ്പോഴും ലാലേട്ടന്റെയും മമ്മൂക്കയുടെയും കൂടെ ആരെങ്കിലുമൊക്കെ കാണും. എന്നാലും ഇടിച്ചു കയറി സംസാരിക്കാരില്ല. അങ്ങനെ ചെയ്യുന്നത് ഇഷ്ടമല്ല. ഒരുപാട് പേരോട് സിനിമയില്‍ അഭിനയിക്കാന്‍ അവസരം ചോദിച്ചിട്ടുണ്ട്. സൈജു കുറുപ്പിന്റേതായി തിയേറ്ററിലെത്തുന്ന ഏറ്റവും പുതിയ ചിത്രം ‘എ രഞ്ജിത്ത് സിനിമ’ യുടെ പ്രൊമോഷന്റെ ഭാഗമായി മൂവി വേള്‍ഡ് മീഡിയയോട് സംസാരിക്കുകയായിരുന്നു താരം.

ReplyForward