ബൈക്കുകളില്‍ കാറിടിച്ച് രണ്ടു യുവാക്കള്‍ മരിച്ചു; രണ്ടുപേര്‍ക്ക് ഗുരുതര പരിക്ക്

പത്തനംതിട്ട: റിങ് റോഡില്‍ വെട്ടിപ്രം ഓര്‍ത്തഡോക്‌സ് പള്ളിക്കുമുന്‍പില്‍ രണ്ടു ബൈക്കുകളില്‍ കാര്‍ ഇടിച്ച് രണ്ട് യുവാക്കള്‍ മരിച്ചു.

പാലക്കാട് സ്വദേശി സജിയും എറണാകുളം സ്വദേശി ശ്രീജിത്തുമാണ് മരിച്ചത്. ഇവര്‍ രണ്ടുപേരും ഒരു ബൈക്കില്‍ സഞ്ചരിച്ചിരുന്നവരാണ്. രണ്ടാമത്തെ ബൈക്കിലുണ്ടായിരുന്ന ഇടുക്കി സ്വദേശി ദേവന്‍ (26), പാലക്കാട് കുഴല്‍മന്ദം സ്വദേശി അനീഷ് (30) എന്നിവര്‍ക്ക് ഗുരുതരമായി പരിക്കേറ്റു. ഇവരെ പത്തനംതിട്ട ജനറല്‍ ആശുപത്രിയില്‍ പ്രവേശിപ്പിച്ചു. ചൊവ്വാഴ്ച രാത്രി 11.40നാണ് അപകടം.

ബൈക്കുകളിലുണ്ടായിരുന്നവര്‍ പെയിന്റിങ് തൊഴിലാളികളാണ്. റാന്നിയിലെ ജോലിസ്ഥലത്തുനിന്നു പത്തനംതിട്ടയിലെത്തി മടങ്ങുകയായിരുന്നു. സെയ്ന്റ് പീറ്റേഴ്‌സ് ജങ്ഷനില്‍ നിന്നു വെട്ടിപ്രം ഭാഗത്തേക്ക് പോകുന്നതിനിടെയാണ് എതിരേയെത്തിയ കാര്‍ ഇടിച്ചത്. ബൈക്കുകള്‍ പൂര്‍ണമായിതകര്‍ന്നു. നാട്ടുകാരാണ് പരിക്കേറ്റവരെ ആശുപത്രിയിലെത്തിച്ചത്. സജി സംഭവസ്ഥലത്തു വച്ചുതന്നെ മരിച്ചു.