ഷാറൂഖ് ഖാന്റെ സൂപ്പര്‍ ഹിറ്റ് ഗാനം ഇന്‍സ്റ്റഗ്രാമില്‍ പങ്കുവച്ച് ഓസ്‌കര്‍ അക്കാദമി

ഷാറൂഖ് ഖാന്റെ ‘ദില്‍വാലെ ദുല്‍ഹനിയ ലേ ജായേംഗേ’ എന്ന സൂപ്പര്‍ ഹിറ്റ് ചിത്രത്തിലെ ‘മെഹന്ദി ലഗാ കേ രഖ്‌ന’ എന്ന ഗാനത്തിന്റെ വിഡിയോ പങ്കുവെച്ച് ഓസ്‌കര്‍ അക്കാദമി. ഔദ്യോഗിക ഇന്‍സ്റ്റഗ്രാം പേജിലാണ് വിഡിയോ പോസ്റ്റ് ചെയ്തിരിക്കുന്നത്. ‘ദില്‍വാലെ ദുല്‍ഹനിയ ലേ ജായേംഗേ’യിലെ ‘മെഹന്ദി ലഗാ കേ രഖ്‌ന’ എന്ന ക്ലാസിക് ഗാനത്തിന് ചുവടുവെക്കുന്ന ഷാറൂഖ് ഖാനും കാജോളും’ എന്ന അടിക്കുറിപ്പോടെയാണ് ഇന്‍സ്റ്റഗ്രാമിലെ പോസ്റ്റ്. അക്കാദമിയുടെ പോസ്റ്റ് ഷാറൂഖ് ഖാന്‍ ആരാധകരെ ഞെട്ടിച്ചിട്ടുണ്ട്. ഇതുമായി ബന്ധപ്പെട്ട ചര്‍ച്ചകള്‍ സോഷ്യല്‍ മീഡിയയില്‍ പുരോഗമിക്കുകയാണ്. ഷാറൂഖ് ഖാന്റെ ഏറ്റവും വലിയ ഫാനാണ് ഓസ്‌കര്‍ എന്നാണ് ആരാധകര്‍ പറയുന്നത്. അതേസമയം ഷാറൂഖ് ഖാന്റെ ഏറ്റവും പുതിയ ചിത്രമായ ഡങ്കി ഓസ്‌കറില്‍ മത്സരിക്കുമെന്ന് റിപ്പോര്‍ട്ടുകള്‍ പ്രചരിക്കുന്നുണ്ട്. ഇന്ത്യയുടെ ഔദ്യോഗിക എന്‍ട്രി ആയാണോ അതോ മറ്റേതെങ്കിലും വിഭാഗത്തിലാണോ ചിത്രം മത്സരിക്കാന്‍ ഒരുങ്ങുന്നത് എന്ന കാര്യത്തില്‍ വ്യക്തതയില്ല. റിപ്പോര്‍ട്ടുകള്‍ ശരിയാണെങ്കില്‍ ഓസ്‌കറില്‍ മത്സരിക്കാന്‍ ഒരുങ്ങുന്ന ഷാരൂഖിന്റെ മൂന്നാമത്തെ ചിത്രമാകും ഡങ്കി. സ്വദേശ്, പഹേലി എന്നിവയാണ് ഇതിന് മുമ്പ് ഓസ്‌കര്‍ പട്ടികയില്‍ ഇടംപിടിച്ച എസ്.ആര്‍.കെ ചിത്രങ്ങള്‍. എന്നാല്‍ ഇതിനെക്കുറിച്ചുള്ള ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല.