‘എനിക്ക് ഒരു മകനേയുള്ളൂ, സിനിമയില്‍ അവസരം കിട്ടിയിട്ടും പേടി കാരണം വിട്ടില്ല’; ഞെട്ടിപ്പിക്കുന്ന വെളിപ്പെടുത്തലുമായി ടിനി ടോം

കൊച്ചി: സിനിമയിലെ ലഹരി ഉപയോഗം ചര്‍ച്ചയാവുന്നതിനിടെ ഞെട്ടിപ്പിക്കുന്ന വെളിപ്പെടുത്തലുമായി നടന്‍ ടിനി ടോം. മകന് സിനിമയിലേക്ക് അവസരം ലഭിച്ചെങ്കിലും ലഹരി ഉപയോഗത്തെക്കുറിച്ചുള്ള പേടി മൂലം വേണ്ടെന്നുവച്ചു എന്ന് ടിനി ടോം പറഞ്ഞു. സിനിമയില്‍ പലരും ലഹരി ഉപയോഗിക്കുന്നുണ്ട് എന്നും താരം പറഞ്ഞു.

കേരള സര്‍വകലാശാല യുവജനോത്സവം ഉദ്ഘാടനവേദിയിലാണ് താരത്തിന്റെ വെളിപ്പെടുത്തല്‍.

‘സിനിമയില്‍ ഒരു പ്രമുഖ നടന്റെ മകന്റെ വേഷത്തില്‍ അഭിനയിക്കാനാണ് എന്റെ മകന് അവസരം ലഭിച്ചത്. പക്ഷേ, സിനിമയില്‍ അഭിനയിക്കാന്‍ മകനെ വിടില്ലെന്ന് എന്റെ ഭാര്യ ഉറപ്പിച്ചു പറഞ്ഞു.

ലഹരി ഉപയോഗത്തെക്കുറിച്ചുള്ള പേടിയായിരുന്നു അവള്‍ക്ക്. സിനിമയില്‍ പലരും ലഹരി ഉപയോഗിക്കുന്നുണ്ട്. 16-18 വയസിലാണ് കുട്ടികള്‍ വഴിതെറ്റുന്നത്. എനിക്ക് ഒരു മകനേയുള്ളൂ’. ടിനി ടോം പറഞ്ഞു.

ലഹരിക്ക് അടിമയായ ഒരു നടനെ അടുത്തിടെ കണ്ടതിനെക്കുറിച്ചും ടിനി ടോം പറഞ്ഞു. അദ്ദേഹത്തിന്റെ പല്ലുകള്‍ പൊടിഞ്ഞു തുടങ്ങി. ലഹരി ഉപയോഗിക്കുന്നതുകൊണ്ട് അദ്ദേഹം നന്നായി അഭിനയിക്കുന്നുണ്ടെന്ന് പലരും പറയുന്നു. ഇപ്പോള്‍ പല്ല്, അടുത്തത് എല്ല് പൊടിയും. അതുകൊണ്ട് കലയാകണം നമ്മുടെ ലഹരി. ടിനി ടോം പറഞ്ഞു.

ലഹരിക്കെതിരായ പൊലീസിന്റെ യോദ്ധാവ് ബോധവല്‍ക്കരണ പരിപാടിയുടെ അംബാസഡര്‍ കൂടിയാണ് ടിനി ടോം.