കൊല്ലത്ത് ഹൗസ്‌ബോട്ടിന് തീ പിടിച്ചു; വിനോദ സഞ്ചാരികളെ രക്ഷപ്പെടുത്തി

കൊല്ലം : ചവറ പൻമന കന്നിട്ടക്കടവിൽ ഹൗസ്‌ബോട്ടിന് തീ പിടിച്ചു. ഹൗസ്‌ബോട്ട് പൂർണമായും കത്തി നശിച്ചു. ബോട്ടിലുണ്ടായിരുന്നവരെ വള്ളത്തിൽ രക്ഷപ്പെടുത്തി കരയ്‌ക്കെത്തിച്ചു. ഇതിൽ രണ്ടുപേർ ബോട്ട് ജീവനക്കാരും മൂന്നുപേർ വിനോദ യാത്രയ്‌ക്കെത്തിയ വിദേശികളുമാണ്. ഇന്ന് വൈകുന്നേരം അഞ്ചുമണിയോടെയാണ് സംഭവം. ആലപ്പുഴയിൽ നിന്നും കൊല്ലത്തേക്കുള്ള യാത്രാമധ്യേയാണ് അപകടമുണ്ടായത്. ജർമൻകാരായ റിച്ചാർഡ്, ആൻഡ്രിയാസ്, വാലെന്റെ എന്നിവരായിരുന്നു ഹൗസ്‌ബോട്ടിലെ യാത്രക്കാർ. കൊല്ലത്ത് ഇറങ്ങിയതിനുശേഷം കാർ മാർഗം വർക്കലയ്ക്കു പോകാനായിരുന്നു ഇവരുടെ ഉദ്ദേശ്യം. കൊല്ലം, കരുനാഗപ്പള്ളി, ചവറ എന്നിവങ്ങളിലെ അഗ്നിരക്ഷാസേനകളെത്തിയാണ് തീയണച്ചത്. അപകട കാരണം വ്യക്തമല്ല.