അമ്മയെപ്പോലെ വധുവായി സൗഭാഗ്യ; വീഡിയോ വൈറല്‍

തിരുവനന്തപുരം: വിവാഹദിനത്തിൽ താൻ വധുവായി ഒരുങ്ങിയതു പോലെ മകള്‍ സൗഭാഗ്യയെ ഒരുക്കി താര കല്യാൺ. തന്നെപ്പോലെ മകളെയും കാണാനുള്ള ആഗ്രഹം കൊണ്ടാണ് ഇങ്ങനെ ചെയ്യുന്നതെന്ന് യുട്യൂബില്‍ പങ്കുവച്ച വീഡിയോയിലൂടെ താര പറയുന്നു. താര കല്യാണിന്‍റെ യുട്യൂബ് ചാനലിലൂടെ പുറത്ത് വിട്ട വീഡിയോ വൈറലായി.

സമൂഹ മാധ്യമങ്ങളിലൂടെ നിരവധി ആരാധകരെ സമ്പാദിച്ച കുടുംബമാണ് താര കല്യാണിന്‍റേത്. അമ്മ സുബ്ബലക്ഷ്മി, അന്തരിച്ച ഭർത്താവ് രാജാറാം, മകൾ സൗഭാഗ്യ വെങ്കിടേഷ്, സൗഭാഗ്യയുടെ ഭർത്താവ് അർജുൻ, ഇപ്പോള്‍ സൗഭാഗ്യയുടെ മകള്‍ സുദര്‍ശനയും മലയാളികള്‍ക്ക് ഏറെ പ്രിയപ്പെട്ട താരങ്ങളാണ്. സമൂഹ മാധ്യമങ്ങളില്‍ സജ്ജീവമായ കുടുംബം, തങ്ങളുടെ വിശേഷങ്ങളൊക്കെ ആരാധകരുമായി പങ്കുവയ്ക്കാറുണ്ട്. ഇപ്പോഴിതാ അമ്മയെപ്പോലെ വധുവായി ഒരുങ്ങി നില്‍ക്കുന്ന സൗഭാഗ്യയുടെ വീഡിയോ ആണ് വൈറലാകുന്നത്.

സെറ്റ് സാരിയും ചുവന്ന ബ്ലൗസുമായിരുന്നു താരയുടെ വിവാഹ വേഷം. അതിനോട് സാദൃശ്യമുള്ള വസ്ത്രങ്ങളും ആഭരണങ്ങളും താര സംഘടിപ്പിച്ചിരുന്നു. തന്റെ വിവാഹ ലുക്കിൽ മകളെ ഒരുക്കിയാൽ അവളായിരിക്കും കൂടുതൽ സുന്ദരിയെന്നും താര പറയുന്നു. സൗഭാഗ്യക്ക് മേക്കപ്പ് ചെയ്തു കൊടുക്കുന്ന താരയെയും വീഡിയോയില്‍ കാണാം. ശേഷം താരയുടെ വിവാഹ ഫോട്ടോ ഫ്രെയ്മിന്‍റെ സമീപം നിന്നുകൊണ്ട് പോസ് ചെയ്യുന്ന സൗഭാഗ്യയെയും വീഡിയോയില്‍ കാണാം.

തൈറോയ്ഡിനുള്ള ശസ്ത്രക്രിയയ്ക്കുശേഷം വിശ്രമത്തിലാണു താര കല്യാൺ ഇപ്പോള്‍. ശസ്ത്രക്രിയയ്ക്ക് മുമ്പ് ചിത്രീകരിച്ച വീഡിയോ ആണെന്നും അമ്മ രോഗമുക്തി നേടുന്നുണ്ടെന്നും വീഡിയോയ്ക്ക് സൗഭാഗ്യ കമന്റ് ചെയ്തു. സംസാരിക്കാനുള്ള ബുദ്ധിമുട്ടും ശബ്ദത്തിലെ വ്യത്യാസവും കണ്ടു നടത്തിയ പരിശോധനയിലാണ് താരയ്ക്ക് തൈറോയ്ഡ് കണ്ടെത്തിയതെന്ന് താരയുടെ അമ്മ സുബലക്ഷ്മി മുമ്പ് ഒരു വീഡിയോയില്‍ പറഞ്ഞിരുന്നു. ആശുപത്രിയിൽ പ്രവേശിക്കുന്നതു മുതൽ ശസ്ത്രക്രിയ വിജയകരമായി പൂർത്തിയാക്കിയതു വരെയുള്ള കാര്യങ്ങൾ ആ വീഡിയോയിലൂടെ അന്ന് താരകുടുംബം പങ്കുവച്ചിരുന്നു.