ഫ്‌ലിപ്പ്കാര്‍ട്ട്‌ന്റെ ബിഗ് ബില്യണ്‍ഷോപ്പിംഗ് ഫെസ്റ്റുകളിലെബിഗ് ബില്യണ്‍ ചതികള്‍

ഉത്സവ സീസണ്‍ന്റെ ഭാഗമായി ഓണ്‍ലൈന്‍ ഷോപ്പിംഗ് പ്ലാറ്റ്‌ഫോമുകള്‍ വന്‍ ഷോപ്പിംഗ് ഫെസ്റ്റുകളാണ് രാജ്യത്ത് നടത്തുന്നത്. എന്നാല്‍, പലപ്പോഴും ഓര്‍ഡര്‍ ചെയ്തതില്‍ നിന്ന് വ്യത്യസ്തമായ ഉത്പന്നങ്ങളാകും ഉപഭോക്താവിന് ലഭിക്കുക. ഇത്തരം നിരവധി വാര്‍ത്തകളാണ് അടുത്ത കാലത്ത് പുറത്ത് വന്നത്. സോപ്പു കട്ടയും പഴയ സാധനവുമൊക്കെ മാറി ലഭിച്ചിട്ടുള്ള വാര്‍ത്തകളാണ് സാധാരണ കേള്‍ക്കാറുള്ളത്. എന്നാല്‍, കഴിഞ്ഞ ദിവസം യുവതിക്ക് ഫ്‌ലിപ്പ്കാര്‍ട്ടില്‍ നിന്നുള്ള പാഴ്‌സലില്‍ നിന്ന് ലഭിച്ചത് പശുവിന്റെ ചാണകമാണ്.

ഫ്‌ലിപ്പ്കാര്‍ട്ടില്‍ നിന്ന് തന്റെ സഹോദരന് വേണ്ടിയാണ് യുവതി വാച്ച് ഓര്‍ഡര്‍ ചെയ്തത്. ബിഗ് ബില്യണ്‍ ഡേ സെയില്‍ നടക്കുമ്പോഴാണ് വാച്ച് ബുക്ക് ചെയ്തത്. 1,304 രൂപയായിരുന്നു വില. ക്യാഷ് ഓണ്‍ ഡെലിവറി ഓപ്ഷന്‍ ആയിരുന്നു തെരഞ്ഞെടുത്തത്. സെപ്റ്റംബര്‍ 28ന് ഓര്‍ഡര്‍ ചെയ്ത വാച്ച് ഒക്ടബോര്‍ ഏഴിനാണ് ലഭിച്ചത്. പണം നല്‍കി യുവതി അത് വാങ്ങുകയും ചെയ്തു. പിന്നീടാണ് പായ്ക്കറ്റ് തുറന്ന് നോക്കിയത്. യുപിയിലെ കൗശാംബി ജില്ലയില്‍ നിന്നുള്ള യുവതിക്കാണ് ഫ്‌ലിപ്പ്കാര്‍ട്ടില്‍ നിന്നുള്ള പാഴ്‌സലില്‍ പശുവിന്റെ ചാണകം ലഭിച്ചത്.

പായ്ക്കറ്റിനുള്ളില്‍ നാറുന്ന ചാണകമാണ് ഉണ്ടായിരുന്നത്. ഉടന്‍ തന്നെ ഡെലിവറി ബോയിയെ വിളിക്കുകയും പാഴ്‌സല്‍ തിരികെ നല്‍കാനും പോയി. കാര്യങ്ങള്‍ മനസിലാക്കിയ ഡെലിവറി ബോയ് പണം തിരികെ നല്‍കാമെന്ന് സമ്മതിക്കുകയും ഉപഭേക്താവില്‍ നിന്ന് ചാണകം അടങ്ങിയ പായ്ക്കറ്റ് തിരികെ വാങ്ങുകയും ചെയ്തു.

കഴിഞ്ഞ ദിവസം ഓര്‍ഡര്‍ ചെയ്ത ഐഫോണ്‍ 13ന് പകരം ഐഫോണ്‍ 14 ലഭിച്ചുവെന്ന വാര്‍ത്തയും സോഷ്യല്‍ മീഡിയയില്‍ വൈറലായി മാറിയിരുന്നു. ഓര്‍ഡര്‍ വിവരങ്ങളുടെ സ്‌ക്രീന്‍ഷോട്ട് അനുസരിച്ച്, ആപ്പിള്‍ ഐഫോണ്‍ 13 ന്റെ 128 GB പതിപ്പാണ് ഓഡര്‍ ചെയ്യപ്പെട്ടത്. ഐഫോണ്‍ 14 ആണ് കിട്ടിയത് എന്ന് കാണിക്കുന്ന ഐഫോണ്‍ 14ന്റെ ബോക്‌സും ട്വീറ്റിലുണ്ടായിരുന്നു.