കണ്ണൂർ സ്ക്വാഡ് മൂന്നാം വാരത്തിലേക്ക്; മികച്ച 10 വിജയ ചിത്രങ്ങളിൽ ഒന്ന്

വലിയൊരു ഹിറ്റിലേക്ക് കുതിക്കുകയാണ് മമ്മൂട്ടിയുടെ കണ്ണൂർ സ്ക്വാഡ്. ചിത്രം മൂന്നാം വാരത്തിലേക്കു കടന്നിരിക്കുന്നു.  നിറഞ്ഞ സദസ്സിലാണ് ഇപ്പോഴും പ്രദർശനം തുടരുന്നത്.  11 ദിവസം കൊണ്ടു തന്നെ ചിത്രം 60 കോടി നേടിക്കഴിഞ്ഞു.. ഒന്നു രണ്ടു ദിവസം കൊണ്ടു തന്നെ ചിത്രം 70 കോടി നേടുമെന്നാണ് ട്രേഡ് അനലിസ്റ്റുകൾ വ്യക്തമാക്കുന്നത്. കനത്ത മഴയെപ്പോലും അവഗണിച്ചാണ് പ്രേക്ഷകർ തിയേറ്ററുകളിലെത്തുന്നത്.

കേരളത്തിലെ എക്കാലത്തെയും മികച്ച 10 വിജയ ചിത്രങ്ങളുടെ ലിസ്റ്റിൽ ഇടം പിടിച്ചു കഴിഞ്ഞു കണ്ണൂർ സ്ക്വാഡ്. കേരളത്തിൽ മാത്രമല്ല, വിദേശത്തും മികച്ച പ്രതികരണമാണ് ചിത്രത്തിനു ലഭിക്കുന്നത്. 

മമ്മൂട്ടിയുടെ പൊലീസ് വേഷങ്ങളിൽ മികച്ചതെന്നാണ് പൊതുവെയുള്ള അഭിപ്രായം. കാസർഗോഡ് നടന്ന ഒരു കൊലപാതകത്തിലെ പ്രതികളെത്തേടി ഉത്തർപ്രദേശ് വരെയെത്തിയ എ എസ്‌. ഐ ജോർജ് മാർട്ടിന്റെയും സംഘാംഗങ്ങളുടെയും കഥയാണ് കണ്ണൂർ സ്ക്വാഡ്. മമ്മൂട്ടി തന്നെ നിർമ്മിച്ച ചിത്രത്തിന്റെ സംവിധായകൻ റോബി വർഗീസ് രാജാണ്.  റോണി ഡേവിഡ് രാജും മുഹമ്മദ് ഷാഫിയും ചേർന്നാണ് തിരക്കഥയൊരുക്കിയത്.