രാവിലെ നടക്കാന്‍ പോയ ആള്‍ സിനിമ നടിയായി

മോഹന്‍ലാല്‍ ചിത്രത്തിലൂടെ തുടക്കം കുറിച്ച് നടി ദിവ്യ പ്രഭ

ചെറിയ ചെറിയ വേഷങ്ങള്‍ ചെയ്തുകൊണ്ട് ഇപ്പോള്‍ നായികാ നിരയിലേക്ക് എത്തി ശ്രദ്ധിക്കപ്പെട്ട നടയാണ് ദിവ്യ പ്രഭ. താരത്തിന്റെതായി വരാനിരിക്കുന്ന പുതിയ ചിത്രമാണ് ഫാമിലി. സിനിമയുടെ  പ്രമോഷനുമായി ബന്ധപ്പെട്ട അഭിമുഖത്തില്‍ സംസാരിക്കവെയാണ് താനൊരു നടിയായിതിന് പിന്നിലെ കഥ ദിവ്യ വെളിപ്പെടുത്തിയത്.

എസ് എന്‍ സ്വാമിയുടെ തിരക്കഥയില്‍, മോഹന്‍ലാലും കാവ്യ മാധവനുമൊക്കെ കേന്ദ്ര കഥാപാത്രങ്ങളായി എത്തിയ, ജോഷി സംവിധാനം ചെയ്ത ലോക്പാല്‍ എന്ന ചിത്രത്തിലൂടെയാണ് ദിവ്യയുടെ വെള്ളിത്തിരയിലേക്കുള്ള തുടക്കം. അതിന് പിന്നില്‍ വലിയൊരു കഥയുണ്ട്. കേട്ടാല്‍ വിശ്വസിക്കുമോ എന്നറിയില്ല എന്ന് പറഞ്ഞുകൊണ്ടാണ് ദിവ്യ ആ കഥ വെളിപ്പെടുത്തുന്നത്.

നടി അന്ന് എം ബി എ യ്ക്ക് പഠിക്കുന്ന കാലമായിരുന്നു. ജോലിയും ചെയ്യുന്നുണ്ട്. അന്നൊരു ദിവസം രാവിലെ ജോഗിങിനായി ഇറങ്ങിയതാണ് ദിവ്യ. സുബാഷ് പാര്‍ക്കിന്റെ അടുത്തുകൂടെ നടക്കുമ്പോള്‍, സിനിമയുടെ ഷൂട്ടിങ് നടക്കുന്നത് കണ്ടു. ഏത് സിനിമ, ആരുടേതാണ് എന്നൊന്നും അറിയില്ല. ഷൂട്ടിങ് കാണാന്‍ കുറച്ച് നേരം അവിടെ നില്‍ക്കാം എന്ന് കരുതി. അപ്പോഴാണ് കോര്‍ഡിനേറ്റര്‍ നിയാസ് എന്നെ കൈ കാട്ടി വിളിച്ചത്. എന്താണ് എന്ന് ചോദിച്ചോള്‍ ഇവിടെ ഒന്ന് ഇരിക്കാമോ എന്ന് ചോദിച്ചു. സിനിമയുടെ ഷൂട്ടിങിന്റെ ഭാഗമാണെന്ന് പറഞ്ഞപ്പോള്‍, ഓകെ ഷൂട്ടിങ് നേരിട്ട് കാണാമല്ലോ എന്ന് കരുതി ഞാന്‍ സമ്മതിച്ചു.

എന്നാല്‍ പിന്നീട് വന്ന് പറഞ്ഞു, അല്ല കുറച്ച് സമയം ഇരിക്കണം ഇപ്പോള്‍ തുടങ്ങുകയേയുള്ളൂ എന്ന്. എനിക്ക് ഓഫീസില്‍ പോകണം, കുറച്ച് സമയം ഇരിക്കാം എന്ന് പറഞ്ഞു. കുറച്ചപ്പുറത്ത് ജോഷി സാറും എസ് എന്‍ സ്വാമി സാറും ഒക്കെ ഇരിക്കുന്നുണ്ട്. വീണ്ടും നിയാസ് വന്ന് ചോദിച്ചു, അല്ല ചെറിയൊരു കഥാപാത്രം ചെയ്യാന്‍ പറ്റുമോ എന്ന് ചോദിക്കുന്നു. സായി കുമാര്‍ എന്ന നടന്റെ അസിസ്റ്റന്റ് ആയി, ഫയലൊക്കെ പിടിച്ച് നില്‍ക്കുന്ന സീനുകളൊക്കെയാണ്. ഡയലോഗ് ഒന്നും ഉണ്ടാവില്ല എന്ന് പറഞ്ഞു. ഹേയ് എനിക്ക് ഡയലോഗ് ഒന്നും വേണ്ട, അതൊന്നും എനിക്ക് വരില്ല. അഭിനയിക്കാം എന്ന് പറഞ്ഞു. അങ്ങനെയാണ് സിനിമയിലേക്കുള്ള എന്റെ എന്‍ട്രി.

പക്ഷെ സിനിമയുമായി എനിക്ക് യാതൊരു ബന്ധവും ഇല്ല. എന്ത് ചെയ്യണം, എങ്ങനെ ചെയ്യണം എന്നൊന്നും അറിയില്ല. അപ്പോഴാണ് ടെലിവിഷനില്‍ ഒന്ന് ശ്രമിക്കാം, അവിടെ നിന്ന് പഠിക്കാം എന്ന് കരുതിയത്. അങ്ങനെ കെകെ രാജീവിന്റെ സീരിയലില്‍ അഭിനയിച്ചു. അതിലൂടെ മികച്ച സീരിയല്‍ നടിക്കുള്ള സംസ്ഥാന പുരസ്‌കാരം ലഭിച്ചു. പിന്നീടാണ് സിനിമകളില്‍ സജീവമായതെന്നും ദിവ്യ പറഞ്ഞു.