നല്ലെണ്ണ തേച്ച് നഗ്‌നനായി കറങ്ങി നടന്ന് സ്തീകളുടെ വസ്ത്രം മോഷ്ടിക്കുന്ന കള്ളന്‍ പിടിയില്‍

പാലക്കാട് : നഗ്‌നനായി നല്ലെണ്ണ തേച്ച് മോഷണത്തിനിറങ്ങുന്ന പിടികിട്ടാപ്പുള്ളി പാലക്കാട് നോര്‍ത്ത് പൊലീസിന്റെ പിടിയില്‍. ചെമ്പലോട് മോഹനനെയാണ് പൊലീസ് അറസ്റ്റു ചെയ്തത്. നഗരത്തിലെ വ്യാപാര സ്ഥാപനത്തില്‍ മോഷണത്തിന് ഒരുങ്ങുന്നതിനിടെയാണ് പിടിയിലായത്. ഏറെ വിചിത്രമാണ് മോഹനന്റെ മോഷണരീതികളെന്ന് പൊലീസ് പറയുന്നു.

രാത്രി നഗ്‌നനായാണ് മോഹനന്‍ കക്കാനിറങ്ങുന്നത്. ശരീരത്തിലാകെ നല്ലെണ്ണ തേച്ചാണ് ഇയാള്‍ മോഷണത്തിന് ഇറങ്ങുന്നത്. വീടിന്റെ ജനല്‍ തകര്‍ത്തു വീടനകത്തു കയറിയാണ് മോഷണം. മോഷണത്തിന് കയറുന്ന വീട്ടില്‍ നിന്ന് സ്ത്രീകളുടെ വസ്ത്രങ്ങള്‍ കൊണ്ടുപോകുന്നതും ചെമ്പലോട് മോഹനന്റെ ശീലമാണ്. കുറച്ചു ദിവസമായി പാലക്കാട് നഗരത്തില്‍ തുടര്‍ച്ചയായി രാത്രിമോഷണം റിപ്പോര്‍ട്ട് ചെയ്തിരുന്നു.

പാലക്കാട് നഗരത്തിലെ കോളനികളിലെ സിസിടിവികളില്‍ ചെമ്പലോട് മോഹനന്‍ പതിഞ്ഞിരുന്നു. പന്ത്രണ്ടിടങ്ങളില്‍ വീടുകള്‍ക്ക് സമീപം കള്ളനെത്തിയിരുന്നു. മൂന്നിടങ്ങളില്‍ കതക് പൊളിച്ച് അകത്ത് കയറാനുള്ള ശ്രമം നടന്നു. ചിലയിടത്ത് ജനലിലൂടെ കൈയിട്ട് പഴ്‌സും മൊബൈലും ഉള്‍പ്പെടെയുള്ള സാധനങ്ങളും കവര്‍ന്നിട്ടുണ്ട്. പരാതിയേറിയതോടെ പൊലീസ് അന്വേഷണം ശക്തമാക്കിയിരുന്നു.

നഗ്‌നനായി കറങ്ങി നടക്കുന്ന മോഹനന്റെ സിസിടിവി ദൃശ്യം പുറത്ത് വന്നതോടെ ടൌണ്‍ സൌത്ത് നോര്‍ത്ത് പൊലീസ് ഉദ്യോഗസ്ഥരുടെ പ്രത്യേക സംഘം രൂപീകരിച്ച് കള്ളനെ കുരുക്കാന്‍ ഒരുങ്ങി. സംഘത്തിന്റെ രാത്രി പട്രോളിങ്ങിനിടെയാണ് മോഹനന്‍ പിടിയിലായത്. പുതിയ മോഷണത്തിനായി ഒരുങ്ങുന്നതിനിടെയാണ് പ്രതിയെ പൊലീസ് പൊക്കുന്നത്. മോഹനന്‍ നേരത്തെ പ്രതി നിരവധി കവര്‍ച്ചാ കേസുകളില്‍ ജയില്‍ ശിക്ഷ അനുഭവിച്ചിട്ടുണ്ട്.