രാജ്യത്ത് തോക്ക് കൊണ്ട് മാത്രമല്ല മാവോയിസം, ചിലര് പേന കൊണ്ടും നടത്തുന്നു; ചിന്തന് ശിവിറില് വിമര്ശനവുമായി മോദി
1 min read
രാജ്യത്തെ എല്ലാം പൊലീസ് സേനക്കും ഒരു യൂണിഫോം എന്ന ആശയം മുന്നോട്ടുവച്ച് പ്രധാനമന്ത്രി നരേന്ദ്ര മോദി. ആഭ്യന്തര മന്ത്രിമാരുടെ ചിന്തന് ശിവിറിലാണ് പ്രധാനമന്ത്രിയുടെ നിര്ദേശം. ഇപ്പോഴില്ലെങ്കിലും ഭാവിയിലെങ്കിലും ഇത് നടപ്പാകുമെന്ന് പ്രതീക്ഷിക്കുന്നതായും പ്രധാനമന്ത്രി പറഞ്ഞു. രാജ്യത്ത് തോക്ക് കൊണ്ട് മാത്രമല്ല, ചിലര് പേന കൊണ്ടും മാവോയിസം നടപ്പാക്കുന്നുവെന്ന് മോദി യോഗത്തില് വിമര്ശിച്ചു. കുറ്റകൃത്യങ്ങളെ ഫലപ്രദമായി നേരിടാന് സംസ്ഥാന പൊലീസും കേന്ദ്ര ഏജന്സികളും തമ്മില് സഹകരിച്ച് പ്രവര്ത്തിക്കണമെന്നും മോദി ആവശ്യപ്പെട്ടു. ഭരണഘടനയില് ക്രമസമാധാനം സംസ്ഥാനങ്ങളുടെ ഉത്തരവാദിത്തമാണെന്ന് പ്രധാനമന്ത്രി നരേന്ദ്ര മോദി പറഞ്ഞു. രാജ്യത്തിന്റെ ഐക്യവും അഖണ്ഡതയുമായി അത് ബന്ധപ്പെട്ടിരിക്കുന്നുവെന്നും മോദി വ്യക്തമാക്കി. രാജ്യത്തിന്റെ ഉന്നതിക്കായി പരസ്പരം സഹകരിച്ച് പ്രവര്ത്തിക്കാനാകുമെന്നും പ്രധാനമന്ത്രി പറഞ്ഞു.
നിയമപാലനത്തെ ശക്തിപ്പെടുത്താന് പല പരിഷ്കാരങ്ങളും നടപ്പാക്കാനായി. പുതിയ നിയമങ്ങള് ഉണ്ടാക്കുമ്പോള് അത് സാധാരണക്കാര്ക്ക് മനസ്സിലാകുന്നതാകണം. സ്വാതന്ത്ര്യത്തിനു മുന്പ് ഉണ്ടാക്കിയ നിയമങ്ങള് പുനഃപരിശോധിക്കണമെന്ന് സംസ്ഥാനങ്ങളോട് മോദി നിര്ദേശിച്ചു. ഇപ്പോഴത്തെ സാഹചര്യങ്ങള്ക്കനുസരിച്ച് അവ ഭേദഗതി ചെയ്യണം. രാജ്യത്തിന്റെ ശക്തി വര്ദ്ധിക്കുമ്പോള് വ്യക്തിയുടെയും കുടുംബത്തിന്റേയും ശക്തി വര്ദ്ധിക്കും. സംസ്ഥാനങ്ങള്ക്ക് പരസ്പരം പഠിക്കാനും പ്രചോദിപ്പിക്കാനുമാകുമെന്നും മോദി പറഞ്ഞു. ചിന്തന് ശിവിര് കോ ഓപ്പറേറ്റീവ് ഫെഡറലിസത്തിന്റെ ഉദാഹരണമാണ് എന്നും പ്രധാനമന്ത്രി വ്യക്തമാക്കി.
പ്രധാനമന്ത്രി വിളിച്ചു ചേര്ത്ത സംസ്ഥാനങ്ങളിലെ ആഭ്യന്തര മന്ത്രിമാരുടെ ചിന്തന് ശിവിറില് നിന്ന് വിട്ടുനിന്ന് മുഖ്യമന്ത്രി പിണറായി വിജയന്. ദില്ലി കേരള ഹൗസില് ഉള്ള മുഖ്യമന്ത്രി ചിന്തന് ശിവിറിന്റെ രണ്ടാം ദിനത്തില് നിന്ന് വിട്ടു നില്ക്കുകയാണ്. ആഭ്യന്തര വകുപ്പ് കൈകാര്യം ചെയ്യുന്ന ബിജെപി ഇതര മുഖ്യമന്ത്രിമാരില് പഞ്ചാബ് മുഖ്യമന്ത്രി ഭഗവന്ത് മാനും, പിണറായി വിജയനും മാത്രമാണ് ഇന്നലെ ചിന്തന് ശിവിറില് പങ്കെടുത്തിരുന്നത്. മുഖ്യമന്ത്രിമാരായ മമത ബാനര്ജി, അശോക് ഗെലോട്ട്, ഭൂപേഷ് ഭാഗല്, നിതീഷ് കുമാര്, എം.കെ.സ്റ്റാലിന്, നവീന് പട്!നായിക്ക് എന്നിവര് യോഗത്തില് നിന്ന് വിട്ടു നിന്നിരുന്നു. യോഗത്തിനെത്തിയവര് ചേര്ന്നെടുത്ത ഗ്രൂപ്പ് ഫോട്ടോയില്, കഴിഞ്ഞ ദിവസം യുപി മുഖ്യമന്ത്രി യോഗി ആദിത്യനാഥിനടുത്താണ് മുഖ്യമന്ത്രി പിണറായി വിജയന് ഇരിപ്പിടം ഒരുക്കിയത്. ഗവര്ണര്ക്കും സര്ക്കാരിനും ഇടയിലെ പോര് രൂക്ഷമായിരിക്കെ ഈ ചിത്രവും മുഖ്യന്ത്രിയുടെ പങ്കാളിത്തവും ചര്ച്ചയായിരുന്നു. ഇതിനു പിന്നാലെയാണ് ഇന്ന് പിണറായി വിജയന് യോഗത്തില് നിന്ന് വിട്ടുനിന്നത്.